tattvajñānasaṁsiddhiḥ

tatvajñānasaṁsiddhiḥ

om namaḥ śrībhagavatyai vajravārāhyai||

ānandāmbudhimaṇḍanādupagatā sambuddhalakṣmīrasau|

sarvākāraguṇānvitā jagadaghadhvāntaughavidhvaṁsinī||

jyotirjñānanidherdhṛtiḥ smṛtinidheḥ śāntirmanīṣānidheḥ|

pāyādvajravirāsinī bhagavatī lokatrayaṁ durgateḥ||1||

śrīvajradevīpadapadmareṇu, rājiṁ namaskṛtya guroḥ padaṁ ca||

śrīsambaraṁ saṁvṛtavodhicittaṁ, prajñākṛpādvaitapadaṁ praśastam||2||

vajradevīpadadvaṁdvavandanānandavarttinā||

bhikṣuṇā jñānandreṇa candrevasuvaśarmaṇā||3||

sādhanaṁ vajravārāhyāḥ svārthaṁkiñjidvibhajyate||

subhāṣitaprade nityaṁ matiḥ kalpanasotsukā||4||

tataḥśradvāpareṇedaṁ mandasvalpadhiyā mayā||

karttavya na mama doṣo vīkṣaṇīyo mahājanaiḥ||5||

om namaḥ śrī vajravārāhyai

udyātā talacakrato'niladhutā vidyucchaṭābhāsvarā, dagdhālitritayā trilokamahitā pīyūṣadhārāplutā||

buddhajñānarasāvilā vikaluṣā svānandasandohadā bhāvābhāvavicāraṇāvirahitā vārāhikā pātu vaḥ||1||

nirmāṇālidineśamaṇḍalagatā kādyādivarṇāvṛtā, prajbālajvalanojvalāmṛtasavā sūkṣmājasūtropamā vidyābuddhakadamvakaṁ dahati yā cakratrayorbhedinī sānandā lalitordvagā sphuratu vo vārāhikā cetasi||2||

praṇipatya vajrapūrvāṁ vārāhīṁ vajrayoginīm|

śirasā svasmṛtaye vakṣye'haṁ tattvajñānasya saṁsiddhim||3||

vijanamano'nukūlasthānaṁ nāthāṁkakaḥ praviśetsudhīḥ||

tatra sukumāramāsanamupaviśya vibhāvayecchuddhiṁ||4||

tadanu ca ṣaṣṭhajinena tryakṣarajaptena vajradharahṛdayaṁ||

saṁlikhyānāmikayā, lohitakusumārcitaṁ kuryāt||5||

tadanu paramādyapātre karakamalaṁ dakṣiṇetaraṁ kṣiptvā

vidadhīta savanaṁ yathopadeśaṁ śayasparśāt||6||

pravidhāya karanyāsaṁ bṛddhāṅguṣṭhāṅgulisamāyogāt

kurvītāṅganyāsaṁ ṣaḍbhirvīreśvarīmantraiḥ||7||

tadanu cakravajravaropari raṅgāruṇoyogajasamamamantraṁ|

bhujagabhavaiḥ suviśiṣṭaiḥ sicayagatairavakirecchanakaiḥ||8||

tatra jinahṛdayacakraṁ śikhikoṭikaṁ samabhilikhya

tadgarbhe mantrālīṁ gāṅgeyaśalākayā vilikhet||9||

cakrasya vāhyabhāge pūrvottarapaścimārkidigdeśe|

satsvastikānabhilikhetkrameṇa vāmahastena||10||

ākṛṣya vajradevīmpraviśya mantrākṣareṣu baddhvā paritoṣayet

suvidhānāt jaḥ hu va horiti paṭhitvā||11||

tadanu saparyā vividhāstasyā vidadhīta maṁtrarūpāyāḥ

bhakṣyairbhojyairlehyaiḥ peyaiścoṣyaiḥ sakāmaguṇaiḥ||12||

vividhairvalaiḥ samadanairupahāraiḥ pañcabhiratiparārdhyaiḥ||

gītaivadyairnnṛtyaiḥ pradakṣiṇāpraṇatinutibhiśca|| 13||

pratidivasaṁ pratipakṣaṁ pratimāsaṁ vā tithau daśamyāṁ||

kuryādyathoktapūjāvidhimasyāḥ siddhimākāṁkṣaṇaḥ||14||

atha kṛtavāhyārcanavidhirurukaruṇo nirmitāridhyāvje||

vyasuhṛyoṣṇaguvimvāṁ dhyāyātpūrvoditāṁ devīm||1||

saṁdhyāsindūravarṇāṁ kharakaranikarāyāstasaptārkkakāntīṁ

karttrīṁ sarvārttihaṁtrīṁ sphuradamṛtaghṛṇīṁ vibhratīṁ savyadoṣṇā||

vibhrāṇāṁ vāmadoṣṇā kamalamatisitaṁ raktapūrṇadhvajāḍhyāṁ

kālyā dambholikālyā parigataśirasaṁ muktamūrddhokhahastāṁ||2||

muṇḍālīmaṇḍitāṅgīṁ mukhagaladasṛjaṁ svādaguṁ muktanādāṁ ,

savye corddhaṁkirāsyāṁ varaśubhagamanāṁ krodhamūlānanāntāṁ||

sānandāṁ sānurāgāṁ vividharasayutāmarddhaparyyaṅkanṛtyāṁ

mudrāṣaṇmudritāṅgīṁ vyapagatavasanāṁ ṣoḍaśāvdāṁ varāṅgīm||3||

jñānākarṣādividhiḥ prāgiva kṛtvā vidhānavinmaṁntrī||

svastikamalikābhimukhaṁ bhramantamekaṁ drūtaṁ dhyāyāt||4||

tadanu viyadvatī dhātau trikūṭagirigahvare bhramaccakraṁ

prāguktamiva dhyāyādraktaṁ jājyalyamānaṁ sat||5||

tatra sthiramivātivegānnirvātaniṣkampadīpamiva dīptaṁ|

drāvayedurusukhacakraṁ śravadamṛtasārakṛtasavanam||6||

kāyatrayasvabhāvaṁ paramaṁ sahajātmakaṁ jagadvyāpinaṁ

sphuradamitaśāntasantatiṁ paśyetpaścātsukhaṁ paścāt||6||

pratidivasaṁ pratisandhyaṁ yathākṣaṇamvā vibhāvayedetat|

yāvatsiddhinimittaṁ tāvadidamucyate vyaktam||7||

ayatnajaprītilayānubandhanāt|

yadā bhavedvyaktamidaṁ vibhāvitam||

kaśācapeṭādiha naiva vedanā|

tadā bhavetsiddhiradūravarttinī||8||

pratāḍitānāṁ paṇavādikānāṁ paṭudhvanirnaśrutagocaraścet||

yadāpyate bodhiranuttarāgrā svapne cirāddhyānavatāgrasiddhiḥ||9||

dṛṣṭvā siddhinimittaṁ pitṛvanagirikuñje vṛkṣamūlādau||

nivasannutpannakramayogamajasraṁ sudhīḥ kuryāt||10||

siddhau vasudhādīnāṁ bhavatī layo hyuttarottarakramaśaḥ

khyāti tadā gaganābhaṁ prabhāsvaraṁ jñānamātraṁ sat||11||

jānīyāttaccihnaiścihnāni tu pañcadhā vidustajjñāḥ||

ata eva tāni yogī samāhito lakṣayenmanasā||12||

prathamaṁ mṛgatṛṣṇābhaṁ dhūmākāraṁ dvitīyakaṁ cihnaṁ||

khadyotavattṛtīyaṁ caturthaṁ dīpojvalaṁ spaṣṭaṁ||13||

vigatābhragaganasadṛśaṁ pañcamaṁ cihnaṁ prakāśamavikalpaṁ||

evaṁ lavdhanimitto mudrāṁ mahatīmavāpnoti||14||

utthātukāmaḥ praṇipatya yoginīṁ

nāthaṁ ca kasthaṁ samudīrya mūḥ kṛtiṁ||

utthāya kṛtyaṁ vidadhīta tatvadhī-

stiṣṭhetsadā yogayugena yogavit||15||

iti tattvajñānasaṁsiddhau bhāvanāvidhiḥ||2||

adhyeṣitaśca bahuśaḥ śiṣyaiḥ kṛtamaṇḍalaiḥ padāvjanataiḥ||

mantrī tithau daśamyāṁ vidadhītānugrahanteṣāṁ||1||

saṁpūjya maṁtrarūpāṁ devīṁ cakrasthitāṁ vihitayomaḥ

ādāya maṁtrajaptaṁ paramādyaṁ niṣkramettasmāt||2||

atha vihitapañcamaṇḍalamūrddhasthāṁ tadantadakṣiṇaṁśiṣyaṁ

kusumasrajaṁ dadhānaṁ dhyātakenāthaṁ guruḥ paśyet||3||

tadanu ca yathoktaṁ devīcakraṁ prodyanmarīcikaṁ rayavat||

dhyātvāntabāsigātre vajrabhṛttasya saṁdadyāt||3||

evaṁ syādāveśastatkalikā prakampanaṁ vāṣpaḥ||

pāto jñānotpādaḥ svārūpañcāpi paripādyāḥ||4||

tadanu kathayetsamādhiṁ pūjāmaṁtraṁ ca vajrayoginyāḥ||

śraddhānvitasya guṇino gurubuddhābhinnasadbhakteḥ||6||

kathayenna yogamenaṁ sadyaḥ pratyayakaraṁ susiddhaṁvā||

śraddhāvirahitamanaso bhaktivihīnaśiṣyasya||7||

vidadhāti yastu pūjāṁ devīcakrasya maṁtrayuktasya||

tasyāpayānti bhayānyaṣṭau pāpāni ca mahānti||8||

durbhagatā dāridryaṁ vyādhijarāduḥkhadaurmanasyāni

bhramakalikaluṣakleśāḥ pīḍā nānāvidhāścāpi||9||

yo japati cakramantraṁ dhyātvā hṛdaye nirodhavācāsau

prāpnotyaṣṭau siddhīḥ pañcābhijñāṁstathāṣṭaguṇāna||10||

dhyāyati yaḥ kiravaktrāṁ pratidavasaṁ yatnataścatuḥsaṁdhyaṁ

hariharahiraṇyagarbhairjetumaśakyāṁ mṛtiṁ jayati||11||

vastrānnapānadhanadhānyaviśālabhūmiḥ

prāsādadivyaśayanāsanasādhanāni||

tasyodbhavanti dayitā vividhāśca vidyā,

yo bhāvayatyaśanikolamukhīṁ sacakrāṁ||12||

iti tatvajñānasaṁsiddhau sānuśaṁsā śiṣyānugrahavidhiḥ||

maṁtroddhāramataḥ paramadhidhāsye vajrayoginīhṛdayaṁ

karṇātkarṇamupāgatamāsyādāsyaṁ tathākramataḥ||1||

pūrvoditamiva cakra saṁlikhyaṁ marudgaṇālayopetāṁ||

tatra likhetparipāṭita ālikāliṁ tathaiva koṇaṁ||2||

jhādharagaṁ ḍādharasthaṁ hādharagavibhūṣitaṁ samāyuktaṁ||

trikamādito vilikhyaṁ sadakṣaraṁ tatvaparidīpi||3||

bhorddhagataṁ chorddhasthitasametaṭorddhasthitaṁ tadanu lekhyaṁ||

ḍādharayutaṁ ṣādhāragaṁ ṣorddhasthitayuktaśorddhagataṁ||4||

ñādharayutaḷtalasthaṁ ṭādharayutaporddhasaṁsthitaṁ||

tadanu ṭhādharagānvitaphorddhagaṁ aivāmayutaṁ haṭāntasthaṁ||5||

casamadhyagataṁ ṭhasavyagasametaṁ bhādharasusaṁsthitaṁ

tadanu hathamadhyagataṁ tavāmayuktaṁ ṭhalamadhyaga paścāt||6||

sarvakarāntaphamadhyagaṁ tṛtīyavargādivāmagasametaṁ||

ṇorddhayutaṁ lādharagaṁ chorddhasthaṁ bhatalagaṁ ṭhasavyayutaṁ||7||

torddhagayutaṁ ṣādharagaṁ thorddhadasaṁyuktaṁ ṇādharagaṁ paścāt||

phādharagaṁ ṭhādharasaṁyuktaṁ phorddhasthaṁ ṇorddhayuktaṁ lādharagaṁ||8||

ḍādharaśūnyasametaṁ trivatalagaṁ corddhasthitaṁ ratalaṁ||

thādharayutaṁ śādharagaṁ ñādharasamāyuktaṁ cāpi||9||

sayamadhyagaṁ jhavāmagasametamuktākṣarakṛto rahasyaḥ||

maṁtroyamaśanīdevyā lekhyo japyo vibhāvyaśca||10||

cintāmaṇiḥ kalpakuṭhāgrakumbhaḥ

śrīkāmadugdhenurapi praśastāḥ

te sādhyamānā dadatīha vittā-

nyayantu saukhyaṁ sadhanaṁ dadāti||11||

iti tatvajñānasaṁsiddhau mantrauddhāravidhiḥ||

yasminnayaṁ pātragatevyalikhya, pūjānimittaṁ vidhinā vidhijñaḥ||

bālasya rakṣā vidhivadvidheyā, vaddhena dokaṇṭhaśikhāsuvāhau||

dṛṣṭvā'payānti bhujagāḥ śiśukaṁ sarakṣaṁ,

bhūtā grahā niśicarāḥ sapiśācasaṁghāḥ||

anye ca bālakabharyārttikarāḥ subhīmāḥ

siṁhaṁ yathā vanacarā valinambhayārttāḥ||2||

saṁprāpya sadupadeśaṁ dṛṣṭvā saṁpratyayaṁ ca yogasya

siddhiriyaṁ samabhilekhi sphuradamalajñānasavaṁsatiḥ||3||

tasmāttatsaṁprāptyai saṁsevyaṁ saguroḥ padāmburuhaṁ||

sānnā pradānabidhinā kāyakleśaiḥ praṇāmaiśca||4||

tatvajñānāgrasiddhirvahuhitajananī yā janasyeva loke

satvānāṁ yanmayosītkuśalamakaluṣaṁ pūrvacadrāṁśuśubhraṁ||

bhūyāsustena lokāḥ kalimalavikalā śuddhāsambodhibhājo

labdhvā mudrāmudārāṁ bhavabhayaśamanīṁ sarvasatvārthakartrīṁ||5||

samāptoyaṁ tatvajñānasaṁsiddhirnāma svādhiṣṭhānaśceti

śubham sarvadā