gaṇḍīstavaḥ

gaṇḍīstavaḥ

ācārya-āryadevakṛtaḥ

āpātālāntadevāḥ suranaragarūḍā daityagandharvayakṣāḥ

siddhā vidyādharādyā jaladhitaṭagatā nāgasattvāḥ samagrāḥ|

gaṇḍīśabdaṁ samantād rabhasitamanasaḥ svāsane'smin prasannāḥ

śrotuṁ [sādho]radhīrā vimalaguṇagaṇasyāsya trailokyabandhoḥ|| 1||

līlāvāsitacāmaraiścaladaho kāñcīprapañcālasat

prāñcatkāñcanakiṅkiṇībhiraraṇat svāsīvahaṁsasvanāḥ|

tāruṇyāmalanīlanīrajadala śyāmāṅkamārāṅganā-

ścakrūryasya na mānasasya vikṛtiṁ buddhāya tasmai namaḥ|| 2||

yeṣāmasti prasādo bhagavati sugate mārabhidyogayukte

ye vā sadyaḥ prasannāḥ sugatasutakṛte svasti yeṣāṁ ca bhaktiḥ|

gaṇḍīmāhatya cāsmin jagati śubhakarāṁ śākyasiṁhasya śāstuḥ

kṛtvā śuddhāntasaṁsthāṁ suvihitamanasaḥ śrotumāyānti sarve|| 3||

buddhaṁ trailokyanāthaṁ suranaranamitaṁ pārasaṁsāratīraṁ

dhīraṁ gambhīravantaṁ sakalaguṇanidhiṁ dharmarājyābhiṣiktam|

tṛṣṇāmārāntakāraṁ kalikaluṣaharaṁ kāmalobhāntavantaṁ

taṁ vande śākyasiṁhaṁ praṇamitaśirasā sarvakālaṁ namāmi|| 4||

ṛmpaṁ ṛmpaṁ ṛṛmpaṁ ṭama ṭama ṭaṭamaṁ tundatundaṁ tutundaṁ

saṁ saṁ saṁ saṁ saṁ saṁ saṁ samasamamasamaṁ durma durma drudurmam|

nāgirnāgirnanāgistakhitakhitakhitastatyajurye raṇe vai

kaiḥ kaiḥ kaiḥ kaiśca kaiḥ kairjagati bhayaharā kīrtyate dharmagaṇḍī|| 5||

kuruta kuruta śrīpaṁ dhyānasannāhamagnaṁ

grasati na khalu yāvad durnivāraḥ kṛtāntaḥ|

iti vadati janaughe bodhitā bhikṣusaṅghāḥ

kṣapitaduritapakṣākīrṇaniḥśeṣadoṣāḥ || 6||

yasminnabhyudite'khilaṁ tribhuvanaṁ yātyastamastaṅgate

yena jñānagabhastihastavisarairhastaṁ yatastanyate|

saddharmāmalamaṇḍalo daśabalaḥ saṁsārarātryantakaḥ

pāyādvai munibhāskaraḥ suragaṇān buddhaḥ prajābāndhavaḥ|| 7||

cittaṁ yena jitaṁ gajendracapalaṁ jñānākṣarairnāṅkuśai-

rnaṣṭaṁ rāgatamo'ndhakārapaṭalaṁ jñānāgninā nāgninā|

dhvastaṁ mārabalaṁ praśāntamatinā kṣāntyāyudhairnāyudhai-

staṁ vande praṇatārtināśanapaṭuṁ buddhaṁ prabuddhaṁ munim|| 8||

tīrthyānāmāśu sainyaṁ jhaṭiti vighaṭayan nākaniṣṭhapratiṣṭhaṁ

bhūyiṣṭhābhiḥ prabhābhirbhuvanamavataraṁstrāsayan bhāsurābhiḥ|

lakṣmīḥ pātālamūle sthitakanakamahāgarbhasiṁhāsanasthā

gītajyotiḥ svayaṁ vo diśatu daśabalo darśitaprātihāryaḥ|| 9||

pādāṅguṣṭhe niviṣṭāṁ kṣipati pṛthuśilādyaiḥ sa rājātigurvī

cograṁ grīṣmapratāpapraśamamupagato valgunā mantrapūtām|

tāmeva trāsyamāno vighaṭayati sukhaṁ śvāsaniḥśvāsavātān

lokaṁ siddhāḥ praṇemuḥ sa diśatu bhagavān sampadaṁ sarvadarśī|| 10||

bhagnā mārādirūpāḥ pralayabhayakarā baddhasannaddhakakṣā

nānā tīkṣṇāgrahastāḥ karituragamukhāḥ siṁhanādaṁ nadantaḥ|

buddhatvaṁ yena nītāḥ kuvalayadaladṛśā[prekṣitā] bhikṣusaṅghāḥ

dharmaṁ kāntaṁ [nitānta]maghadalanapaṭuṁ tīrthikāṇāṁ śṛṇudhvam|| 11||

cittaṁ yasyāṅganāyā ratitaraladṛśā'pāṅgabhaṅgaiḥ subhaṅgaiḥ

kṣobhaṁ naivāśu nītaṁ kucakalaśabharairhāralīḍhaiḥ sulīḍhaiḥ|

tasyaiṣā dharmagaṇḍī madhurakalaravaṁ rāvate bhikṣusaṅghaṁ

dharmaṁ kāntaṁ tadīyaṁ paramabhayakaraṁ tīrthikāṇāṁ śṛṇudhvam|| 12||

yaḥ śrīmān dharmacakre pramuditamanasā dharmaratnaikamauli-

rbhūyāṁsaṁ pūrṇadehaṁ vikasitavadanaṁ dharmaratnodagirantam|

siṁhākrāntāsanasthaḥ kanakagirinibho dharmanādaṁ nadantaṁ

tasyeyaṁ dharmagaṇḍī praṇadati satataṁ saṁśṛṇudhvaṁ jinasya|| 13||

mā mā mā mīyakaṇṭhairḍimaḍimagagatā gāgagāgairgalantaiḥ

nā nā nā nopanītaṁ nanu nanu nanu mā dhuryamādhuryakāntaiḥ|

gītaiḥ kāmāṅganānāṁ pracalitamabhavad yasya ceto na śarmi

tasyaiṣā dharmaketoḥ paṭupaṭaharavā rāraṭītyugragaṇḍī|| 14||

kiṁ saṁvartapradattaprasavavanacarā dīrghasaṁrambhanādāḥ

kiṁ vā nirvāṭaghātaḥ kimuta bhagavatī hukṛtirvajrapāṇeḥ|

tatsarvaṁ vai janānāṁ pravacanamatayo draṣṭumantaḥpravṛttā

buddhasyodāramūrtestridaśabhayakaro gaṇḍivādaḥ sa eṣaḥ|| 15||

ūrjāsaṁghātimārā vikṛtanakhamukhā raudrasiṁha[sva]rūpāḥ

pātāle ratnadīpe prakaṭamaṇigaṇāḥ śabditāḥ parvatendrāḥ|

devendrairmauliratnaiḥ praṇamitacaraṇasyāsya viśvaikabandho

rautyeṣā hanyamānā yatiṣu śubhavidaḥ śākyasiṁhasya gaṇḍī|| 16||

kīrtirnātha pramathakamanaṅgo'stu vā tattvadīyā

dīnānāthoddharaṇa purato gīyate māraśatroḥ|

khindaṁ khindaṁ khikhindaṁ khuda khuda sukhadaṁ dattake dattutundaṁ

tundaṁ tundaṁ tutundaṁ dhvanipaṭupaṭahaiḥ siddhagandharvanāgaiḥ|| 17||

mārairnānāprakārairvikṛtaśatamukhairbhūrivaktrairjvaladbhi-

rbhīmairaṭṭāṭṭahāsaiḥ palalakavalitaiḥ siṁhanādaṁ nadadbhiḥ|

kālākārairanekairgahanabhayakaraiḥ sarvato bhīṣayadbhi-

rvyāptaṁ ceto na yasya kṣaṇamapi niyataṁ mārabhaṅgaḥ sa vo'vyāt|| 18||

rājā niṣkaṇṭarājyo bhavatu vasumatī sarvasasyābhipurṇā

kāle varṣantu meghā vyapagatavipadaḥ santu lokāḥ samastāḥ|

vīhāre karmapūrṇaṁ yadakhilanṛṇāṁ sarvavidhnopaśānti-

ranyonyaprītibhāvād bhavatu sukhamayo vītarāgāryasaṅghaḥ|| 19||

śāstuḥ saddharmaratnaṁ sugatavarasutān prerayantī viśuddhayed

rāgadveṣairvimūḍhān viṣamapathagatān rāvayantī jayantī|

sattvānuttārayantī praśamaśaraśatairvidyamānārthavantaṁ

śāstuḥ saṁprītihāryaṁ vividhavararutaiḥ śāntikārī janasya|| 20||

spheṭantaṁ vāranāryā vikaṭagaṇaghaṭāṭṭāṭṭahāsaṁ nadantaṁ

khelantaṁ visphurantaṁ jvaladanalaśikhākāntalīlāṁ dadantam|

bhantaṁ premaprakāmaṁ sphuṭaduruvacasaṁ kāmadhātvīśvaratvaṁ

taṁ vande vandanīyaṁ sakalabhayaharaṁ buddhavīraṁ suvīram|| 21||

saṁpanne'ṅguṣṭhapadme jhaṭiti hṛdi tathā kaṇṭha evopakaṇṭhe

ḍhakkāsaṁkāśatālaiḥkalapaṭupaṭahaiḥ śaṅkhanirghoṣighoṣaiḥ|

hā hā hu hū kṛtā ye jhaṭiti kaṭakaṭairbhīmanādānumodaiḥ

kṣudraṁ ceto na caitat suravarajayino yasya tasmai namo'stu|| 22||

garjantaṁ vāgviśeṣaṁ prakaṭapaṭuravairdivyagāndharvaśabdai-

rnānānāgendrayakṣaiḥ stuticaṭulaśataiḥ pūjyamānā mahadbhiḥ|

sāṁkhye māheśvarīyānasuragurutam.................................

.............................mārabhantī karakamalagatā śāntimārāraṭīti|| 23||

dattvā sarvasvadānī kratukanakamayaṁ vārāṇānāṁ śataṁ vā

rājyaṁ putraṁ kalatraṁ svatanumapi śiraścakṣuṣāṁ vā sahasram|

yenā...........................bhirapi śatairvatsarāṇāṁ vyayatvāt

samyaksambodhiragrā sa jayati sugataḥ śāntaye sajjanānām|| 24||

nānārūpavirūpadṛśyavikṛterbhūyo grased bhūtibhi-

rbodhairyoṣiti rodhanaprajanitajyotirjvala[dbandha]naiḥ|

mārasyānucarairna yasya sudhiyaḥ kiñcinmanaḥ kampitaṁ

nṛtyairvā sugatasya mārajayino gaṇḍī raṇatyadbhūtam|| 25||

yasyā nādaṁ niśamya śravaṇasukhakaraṁ yānti tṛptiṁ samantāt

pretā bhūmīmukhādyāḥ pṛthutaravapuṣaḥ kṣutpipāsābhibhūtāḥ|

samyagabhaktyā prasannaiḥ suranaravapuṣaiḥ śrūyate cāturairyā

sā gaṇḍī pātu viśvaṁ daśabalabalinastasya mānā manojñā|| 26||

nānāvādyakarīndravājimahiṣavyāghrādiśabdairyutaṁ

cañcatkuntasubāṇatomaragadācakrādiśastrodyatam|

bhagnaṁ sainyamanena yodhasahitaṁ mārasya yena kṣaṇāt

tasyeyaṁ karuṇānidherbhagavataḥ pāyājjagad gaṇḍikā|| 27||

dharme saṁrambhacittāḥ prabhavahatavidhiḥ pāpataḥ sarvadaiva

dāne śīle kṣamāyāṁ paṭhati sakaruṇe sajjanāḥ saṁyatāḥ syuḥ|

ityevaṁ sarvasattvān sumadhuraraṇitairbodhayantī viśuddhā

tannaḥ puṇyairvacobhistrijagati sakalaṁ buddhavīrasya gaṇḍī|| 28||

śṛṇvantī sāvadhānā praśamatataśarābhyāsanairnaiva śabdaṁ

sendrādānandavajrī svabhuvananṛpatestuṅgaveleva devān|

vandībhūtān munīndrān pravacanapaṭutākārasaṁrambhaśabdai-

ryā gaṇḍī daṇḍaghātakramamanuraṇanād dundubhīvad dhunoti|| 29||

huṁkārī padmayonistripuravijayino vallabhaḥ śūlapāṇi-

rviṣṇuryad vajrapāṇiḥ surapatirasuradhvaṁsanaścakrapāṇiḥ|

ye vā cānye stuvanti pramatanijarave kṣobhabhāve kimāste

sarve tasyāṅaghrimūle vinayamupagatā geyamantraṁ stuvāmi|| 30||

ajñān sarvajñanāthān munipadasahitān bhrāmayantī trilokaṁ

mārāṁścānyaprakārairvividhabhayakarān trāsayantī samastān|

pāpān protsārayantī viṣayaratidhiyaḥ paṇḍitān bodhayantī

proccaiḥ saṁruddhabodhyān pravadati bhuvane śākyasiṁhasya gaṇḍī|| 31||

vyāghrayai dattvā svadehaṁ guṇaśatanivahaṁ puṇyasambhāralabdhaṁ

buddhatvaṁ yaḥ prayātaḥ pratihatadurito manmathonmādanārthī|

śāstā yaścādvitīyo bhavabhayabhiduro bhinnapāpābhisandhi-

stasyeyaṁ vai vicitrā stanati bhagavataḥ śākyasiṁhasya gaṇḍī|| 32||

māyādevyāśca kukṣau janitajinavaraḥ śākyasiṁho munīndro

bhūmni prāyāttu madhye pravarasumuninā lokavṛkṣasya mūle|

devendrabrahmarudrāsuranaravibudhaiḥ snāpito yaḥ sa deva-

staṁ vande bhaktiratnaiḥ śaśadharakiraṇākṣodidehaṁ munīndram|| 33||

mārairnānāprakārairasiparaśudhanurbāṇahastairjvaladbhi-

rbhīmāsyairduṣṭadaṁṣṭrairgajabhujagamukhaiḥ siṁhavaktraiḥ śvavaktraiḥ|

pratyañcenonamasya kṣaṇamapi śamitastasya buddhasya pādau

gantuṁ loko'pi sarvo dhruvamiti gatabhīścaiṣu gaṇḍī ninādyā|| 34||

śrī gaṇḍīstavaḥ samāptaḥ|

kṛtiriyam ācārya-āryadevapādānām|