citralakṣaṇam

citralakṣaṇam

atha bhāratīyabhāṣāyāṁ citralakṣaṇam |

prathamaḥ parivarttaḥ

brahmāṇaṁ ca mahādevaṁ nārāyaṇaṁ sarasvatīm |
varadāṁ ca mayā natvā kriyate jayamaṁgalam ||1

prajāpatestathā śambhoḥ padmāsyāyāstathā giram |
pārvatyā anusṛtyaiva jāyatāṁ kila paṇḍitāḥ ||2

tadanantaraṁ citralakṣaṇamucyate |
maṁgalamastu |

mahādevāya devāya sarvavidyavijānate |
namo namo mayā samyagucyate citralakṣaṇam ||3

ādau candramasaṁ vande haraṁ ca candraśekharaṁ |
viṣṇūvindrau sūryamagniṁ ca varuṇaṁ marutaṁ tathā ||4

namaskaromyahaṁ caiva viśvakarmaprajāpatī |
nagnajitaṁ namaskṛtya tvācāryāṁśca punaḥ punaḥ ||5

varṇaṁ ca citrakarmātha śāstrānusāratastathā |
yathājñānaṁ yathāśakti saṁkṣepeṇa mayocyate ||6

viśvakṛnnagnajiddevaprahlādasāramujjvalam |
lakṣaṇamanusṛtyaica viduṣāṁ sudhiyāṁ punaḥ ||7

saṁgṛhya mativṛddhaye nānāśāstrasamuddhṛtam |
ucyate citralakṣaṇaṁ śṛṇvantu tadvidā janāḥ ||8

puredaṁ lakṣaṇaṁ śrutvā nararājo mahodharaḥ |
dharmajñaḥ satyaniṣṭhaśca buddhimāṁśca yaśo'nvitaḥ |
viśruto bhayajinnāmnā tathābhūt dharaṇītale ||9

guṇottamasya bhūpasya dhārmikasya praśāsane |
śatasahasravarṣāṇi cāyuḥ prajāḥ prapedire ||10

nīrogā na ca hantāro manorogavivarjitāḥ |
akālamṛtyuhīnāstāḥ kutaḥ krodhāḥ kuto malāḥ ||11

vāyuḥ supravahaścaiva śakraḥ suvarṣakastathā |
varṇrasasametāni vījamūlaphalāni ca || 12

varṇāśramā hi catvāro na cyutā dharmatatparāḥ |
ṛddhiguṇasamāyuktaṁ śrīmad vikasitaṁ jagat || 13

evambhūte sthite rāṣṭre sukhaśāntisamanvite |
bhayajito manaḥ śuddhaṁ pravṛttaṁ tapasi drutam || 14

suduṣkaraṁ tapaḥ kṛtvā rājñātiśuddhacetasā |
varā bahuvidhā prāptā devāllokapitāmahāt || 15

viṣayastasya śatrubhirdevāstrairapi durjayaḥ |
uttamāpratirodhyā ca sarvaśāstre matistvatha || 16

sarvaguṇairupetasya parākrāntasya dhīmataḥ |
mahābhāgasya devānāṁ prabhāvaiḥ prāptaviśruteḥ || 17

sarvavidyāśrayasyāsya mūrttadharmasya bodhinaḥ |
maṇiputrasamākhyaspa etādṛśasya bhūpateḥ || 18

savidhe tvāgataḥ kaścid rudan vipro'tiduḥkhitaḥ |
kathaṁ rodiṣ bho vipra cetyapṛcchad dvijaṁ nṛpaḥ || 19

kruddhena tena vipreṇa kathito nṛpatistadā |
tava śāsanakāle'smin deśe'kālamṛtiyataḥ || 20

tato'dharmeṇa rājyaṁ taṁ śāssīdaṁ nṛpa niścitam |
viṣmayo ya itaḥ pūrvaṁ na jāto'sau pravartate || 21

madīyavaṁśarakṣākṛt lakṣaṇākṛtisundaraḥ |
akālamṛtyunā kasmāt kroṛato'pahṛtaḥ sutaḥ || 22

bramha priyau hi rājan tvaṁ sarva jānāsi bhūtale |
prāṇatulyaṁ sutaṁ mahyaṁ dehi svāmin kṛpānvitaḥ ||23

dayāṁ yadi na kuryāstvaṁ śaktiman guṇavan nṛpa |
tṛṇakhaṇḍāṇiva prāṇān tvatsavidhe tyajāmyaham || 24

bhāṣite tu dvijenaivaṁ buddhimān puraṣottamaḥ |
ākarṣaṇe sutaṁ tasya matiṁ cakre nṛpālakaḥ || 25

sāntvitastu nṛvākyena " āgaccha mama dāsa hi" |
sūryavarcodharaṁ yamamuditaṁ tatra dṛṣṭavān || 26

dharmarājaṁ jagadbandyaṁ praṇamya bhayajinnṛpaḥ |
brāhmaṇasya hitārthāya sādaraṁ vākyamabravīt || 27

pratyupakṛddvijātestu prāṇebhyo'pi sutaḥ priyaḥ |
cākāle'pahṛto yo'sau tava dūtena durdhiyā || 28

prabho tribhuvanasyāpi dīyatāṁ tanayaḥ priyaḥ |
viśvakarman dvijanmane asmai prītyā ca dhīmate || 29

śrutvā pretādhipo vākyaṁ pūjanīyaṁ hasan nṛpam |
dadau pratyuttaraṁ mṛdu tejasā pūritaṁ vacaḥ || 30

svakīyakarmavaśād jīvāḥ sarve madvaśagā dhruvam |
kasyāpyākarṣaṇe tyāge svecchāśaktiḥ kuto mama || 31

sukhaṁ vā yadi vā duḥkhaṁ sarvaṁ karmavaśaṁ sadā |
tasmāt rājan vijānīyān mayā naiva pragṛhyate || 32

madgṛhaṁ pratipadyātha śarīrī na nivartate |
kālena mahatākṛṣṭo dvijaputro balīyasā || 33

kuśalaṁ cākuśalaṁ vā sarvamihānubhūyate |
karmānusāriṇī bhūmirvijñeyā ca sadā nṛṇām ||34

evamuktaḥ punarbhūpaḥ prāha vaivasvataṁ yamam |
matprārthanāvaśād deva dehyasmai putramuttamam || 35

na śakyate na śakyate yama āha punaḥ punaḥ |
dehi dehi sutaṁ deva rājñāpi prārthitaḥ punaḥ || 36

āgrahasyātiśayyaṁ ca tayoritthaṁ babhūva ha |
vyākulau tī mahāyuddhe tadā liptau babhūvatuḥ || 37

tiṣṭha tiṣṭheti ta rājā bahuśaḥ prāha vīrahā |
sthito'smīti raṇe rājan tamavocad nṛpaṁ yamaḥ || 38

asaṁkhyānāṁ ca vāṇānāṁ tīkṣṇānāṁ parivarṣaṇam |
akarod bhayajid rājā yamasyopari sarvataḥ || 39

śrutaghnaṁ sarvato divyaṁ meghato vārivarṣavat |
apratirodharupaṁ tadastraṁ vavarṣa dharmarāṭ || 40

tena rājā mahākruddho mahāprabhāvaśālibhiḥ |
yamadūtāṁścadevāstraiḥ prapīḍya mumude bhṛśam || 41

śūlāsiprāsamudgarā yamadūtavinirgatāḥ |
bhūpena sarvathā naṣṭā bhayapravartakā ime || 42

preto dāruṇarupī ca pratidiśamadhāvata |
naṣṭaḥ senāpatiścaiva āgamadāhavād drutam ||43

tataḥ pretādhipo devo dṛṣṭvā taṁ tu parājitam |
yathājñākāriṇaṁ daṇḍaṁ jagrāha pratihiṁsayā || 44

kālāgnisadṛśaṁ dṛṣṭvā utkṣiptaṁ pṛthivīpatiḥ |
brahmaśiro'ṅkita cāstramātmahaste gṛhītavān || 45

sarve bhūtā bhayatrastā mahābhūto'pi sarvataḥ |
babhūvurāturā sarve tena durlakṣaṇena vai || 46

duḥkhitāṁ sakalāṁ pṛthvīṁ dṛsṭvā brahmā tathā suraiḥ |
ājagāma svayaṁ tatra tasmin deśe raṇākule || 47

brahmāṇaṁ svāgata dṛṣṭvā bhayajinnṛpasattamaḥ |
sāñjaliḥ pūjayitvā taṁ prāha yathāyathaṁ vacaḥ || 48

yamo'pi praṇipatyātha sarvāmakathayat kathām |
vaiklavyakāraṇani ca śrutvā śeṣāṇi sṛṣṭikṛt |
pratyāvṛtya raṇād devaḥ kathayāmāsa tau tadā || 49

na doṣo bhavatāṁ nātha mṛtyupatermahātmanaḥ |
satyanarādhipasyaiva kālasya na tu karmaṇaḥ || 50

purā śubhāśubhaṁ karma tathā ca śiśunā kṛtam |
labdhañca maraṇaṁ śīghra janma prāpya ca mānuṣam ||51

sāphalyameti te śramo brāhmaṇasyāsya pūjanāt |
tasminnupāyavidyeyaṁ matprasādāt prapūjyatām || 52

varṇādīnāṁ samāyogaiḥ etaddvijasutākṛtim |
rupamālikha bho rājan sarvalokahitāya vaṁ || 53

āvirbhūtena brahmaṇā itthamukte suvuddhimān |
jīvayituṁ lilekha taṁ dvijaputraṁ mahopatiḥ |
brahmā taccitramādāya yojayāmāsa jīvitam || 54

vikacotpalacakṣuṣmān sukumāraśarīradhṛk |
cakṣurunmīlya sānandaṁ punarjīvanamāpede || 55

jīvitaṁ putramāsādya hṛṣṭo brāhmaṇasattamaḥ |
bramhāṇamabhivandyātha svīyaputraṁ gṛhitavān || 56

brahmābravīt tato bhūpaṁ brāhmaṇaprītaye ime |
yamadutā jitāḥ śaktyā sādhu sādhu kṛtaṁ tvayā || 57

brahmāṇā kathite tvevaṁ sa rājā harṣamāptavām |
sarvadamankārī tu daurmanasyaṁ yamo gataḥ || 58

aprasannaṁ yamaṁ dṛṣṭvā vacobhirmadhurairbhṛśam |
brahmā svayaṁ samāśvāsya bhūpatiṁ prāha sattamaḥ || 59

dharmanītiḥ suvijñāya na nindet kāmapi prajām |
sadānandapradobhavyastvabhimānaṁ ca varjayet || 60

yatra sevā satāṁ nāsti tatra nindā bhaved dhruvam |
nālpamapi sukhaṁ kiñcidānpoti nindukaḥ sadā || 61

dveṣiṇo'pi budhāḥ svargād bhavanti vicyutāstahā |
ahaṅkānarayuta bhūtaṁ tyajanti sarvamānavāḥ || 62

nirahaṅkāriṇā tasmāt bhavitavyaṁ sadā khalu |
jātyā balena dānena naipuṇyena ca vidyayā ||63

devatānāñca viprāṇāṁ viśeṣaṇa samādaraḥ |
prakartavyo na kartavyo nindopāyaḥ kathañcana || 64

avirodhena satkāraḥ karaṇīyaḥ sadā nṛpaiḥ |
kṣamāvalambanīyā syāt nindā tyājyā tathaiva ca |
sarvajño nirahaṁkaro guṇine na dviṣennṛpaḥ ||65

puruṣaṁ vacanaṁ tyājyamāghātaṁ visṛjet sadā |
pratyakṣaṁ prāpyate yattu sārthakyaṁ tasya cintayet || 66

devavipravirodhināṁ kutrāpi na sukhaṁ bhavet |
vidhiyaṁ naiva kāryaṁ hi yamasyāpi tato nṛpa || 67

brahmaṇetthaṁ sa bhūpālo hyupadiṣṭo dvijapryaḥ |
namaskṛtya yamasvārthe kṛtavān supriyaṁ tathā | 68

yamo'pi prītimāpanno brahmā prasannatāṁ gataḥ |
aśokaṁ prītimāpede jagadetañcarācaram || 69

atha brahmā nṛpaṁ prāha nagnaṁ pretaṁ nivāraya |
yamadāsaiḥ sadā viśvaṁ na pātayed bhavān khalu || 70

balena tejasā cāpi tapasemaṁ guṇaṁ nṛpāḥ |
anukuryurna karttavyo'kuśala iha bhāvini || 71

bhavān mahāyaśasvī ca karaṇīyo mayā kṣitau |
nivartasva kumārgebhyastvaṁ sadā pṛthivīpate || 72

pretaparyāyakaṁ nagnamajaiṣīstvaṁ yato balāt |
mama prasādād rājendra brāhmaṇānugrahāttathā |
prajāpatitulaḥ pṛthvāṁ yaśasvī tvaṁ bhaviṣyasi || 74

vedajño vrataniṣṭhaśca tapasā śuddhamānasaḥ |
prajāḥ pālaya niṣpāpaḥ anumatistathā mama || 75

asya brāhmaṇaputrasya citrasya lekhanena ca |
tādṛśeṇa kṣitāvādicitrāviṣkārako bhava || 76

lokānāṁ hitasādhanāt pūjanīyo bhaviṣyasi |
adya prabhṛti taccitra jagadvandyaṁ bhavet sadā || 77

pāpaghnaṁ ca manohāri protisukhapradaṁ nṛṇām |
maṅgalaśropradāyakaṁ rakṣoghnaṁ śatrunāśanam || 78

tavādau lekhakakhyātiḥ mameyaṁ vacanena ca |
citramiti prasiddhaṁ tat sarvatraiva bhaviṣyati || 79

brahmaṇetthaṁ vacasyukte yamo vipraśca nagnajit |
sarve nemuśca bhaktyā taṁ brahmāṇaṁ lokapālakam || 80

sarveṣāṁ maṅgalaṁ kṛtvā trilokeśaḥ prajāpatiḥ |
sarvadevagaṇaiḥ sārdhaṁ jagām svagṛhaṁ mudā ||81

rājātha dharmarājaṁ taṁ pūjayitvā prayantataḥ |
svasthānamāgato dhīmān prīṇayitvā yamaṁ tathā || 82

athāsau brāhmaṇastuṣṭaḥ prapayau nagaraṁ drutam |
yasmād deśāt samāpannastatraiva praviveśa ca || 83

hṛṣṭo rājā samitraśca citrasaṁracanāya vai |
udyato'bhūt sadaivāsau saputre prasthite dvije || 84

sarvarūpānukūlaṁ tat mānaṁ vā kīdṛśaṁ bhavet |
tat praṣṭuṁ sṛṣṭikattariṁ brahmalokaṁ jagāma saḥ ||85

kṛpayā brūhi me brahman citrasaṁlekhanakramam |
citrasya lakṣaṇāni me nānāvidhāni santi ca || 86

parimāṇaṁ kimasya syāt vidhinā kīdṛśena vā |
utpādanīyametaddhi sāñjaliḥ pṛṣṭhavān nṛpaḥ ||87

brahmātha prāha bhūpendraṁ śṛṇu rājan samāhitaḥ |
atiguhyaṁ mahad vākyaṁ paramaṁ kathayāmi te || 88

sṛṣṭerādau samāyātā vedā yajñāśca bhūpate |
tataḥ prajā mayā sṛṣṭā upadiṣṭāśca tā mayā || 89

caityānāṁ karaṇāyaiva citraṁ saṁlikhyate yataḥ |
vedāccitraṁ prajātaṁ vai tasmād jñeyaṁ tathaiva tat || 90

ādau saṁlikhitatvācca citramityucyate tataḥ |
carācarayutā vṛkṣā jaṅgamāśca yathāsthitāḥ |
tathā pralikhanātteṣāṁ taccitramiti kathyate || 91

girīṇāṁ sumeruḥ śreṣṭhaḥ aṇḍajānāṁ khagādhipaḥ |
yathā nareṣu bhūpendrastathā citraṁ kalāsu vai || 92

patanti sāgare nadyaḥ samudrā ratnamāśritāḥ |
nakṣatraiścāśritaḥ sūryo bramhā ṝṣyāśrayo yathā |
tathaiva citrakarmaṇi kalāḥ sarvāḥ samāśritāḥ || 93

himālayo yathā śreṣṭho nageṣu sakaleṣu ca |
gaṅgā nadiṣu śreṣṭhaiva graheṣu somabhāskarau || 94

sameṣu vainateyaśca mahendro devavṛndake |
tathā śreṣṭhaṁ bhaveccitraṁ sarvāsu hi kalāsu ca || 95

nagnajid gaccha tasmāt tvaṁ viśvakarma samīpataḥ |
lakṣaṇavidhimānaṁ ca tubhyaṁ sa upadekṣyati || 96

upadeśamanusṛtya brahmaṇo bhūpatistataḥ |
viśvakarmasamīpe tu prasanno hyagamad drutam || 97

dṛṣṭo'sau viśvakarmā ca rājñā namaskṛtastathā |
ātithyaṁ vidhivat kṛtvā rājñe so'dadadāsanam || 98

rājāha viśvakarman bho brahmajñayā hyupasthitaḥ |
citrsya lakṣaṇaṁ karma upadiśatu me prabho || 99

vidhirvā parimāṇaṁ vā kīdṛśaṁ vā bhavettathā |
upadiśatu kārtsnyena rahasyaṁ saprakārakam || 100

evamukte narendreṇa viśvakarmā mudānvitaḥ |
citraśilpasya śāstraṁ tu tasmai rājñe hyupādiśat | 101

ekāgramanasā tattu śrūyatāṁ yad madbhāṣitaṁ |
parimāṇaṁ tathāsthānaṁ varṇopāyau yathāyatham || 102

pradāya sarvamīśena devena padmayoninā |
nirdiṣṭaṁ citralakṣaṇaṁ buddhimantaḥ kṛte śṛṇu || 103

sarvavastusamākīrṇā ākṛtīrlakṣaṇānvitāḥ |
lokaśraddhāspadaṁ mahyaṁ likhitvādau hyupāharat || 104

kena mānena śobhanāḥ sthānopāyaiśca kīdṛśaiḥ |
brahmaṇaḥ kṛpayā labdhāḥ sarve śilpā mayā kṛtāḥ || 105

ākāreṇedṛśenaiva prajā mayā vinirmitāḥ |
devaiścitraṁ vivarddhitaṁ vividhaṁ lakṣaṇānvitam || 106

jñeyaṁ mattastvathā rājan lakṣaṇamākṛti tathā |
sādṛśyaṁ veśasaundaryaṁ parimāṇaṁ kalānvitaṁ || 107

citramīdṛśaṁ saṁlekhyaṁ yatnād buddhimatā tvayā |
darśanīyaṁ manuṣyebhyo vidvabhyo guṇayuktebhyaḥ |
citrasandarśane tāvadutsāhamatiyuktebhyaḥ || 108

munināgāsurāṇāṁ ca pretānāṁ yakṣarakṣasām |
gandharvāṇāṁ ca rājendra vidhivat kakṣaṇādikam |
likhitvā vividhaṁ samyak tubhyaṁ mayā pradaśryate || 109

||iti nagnajiccitralakṣaṇanirdeśe nagnajayo nāma prathamaḥ parivarttaḥ ||

dvitīyaḥ parivarttaḥ

yathoktaṁ brahmaṇā pūrvamācaṣṭe bhūpatiṁ tathā |
likhanādividhiṁ samyak citrasya parinirmito || 1

sthāvare jaṁgame naṣṭe pralayānte ca vai purā |
prādurabhūt suvarṇāṇḍaṁ tamo hatvā jalāt kila || 2

tasmādaṇḍāt prādurabhūt lokapitāmahaḥ svayam |
omityekākṣaraṁ tasmād vedavidyāśca kalpanā || 3

catasraśca prajāstāsāṁ rupasaṁjñādayastadā |
āyuṣā sahitasyaiva brahmaṇo jātireva ca || 4

sthānaṁ caryā ca dharmaśca nyāyaśca prābhavan tadā |
evaṁ kṛte sati brahmācintayat jagato hitam || 5

evaṁ cintayatastasya matiritthaṁ babhūva ha |
kathaṁ janāśca jānīyuḥ saṁjñāṁ devamahībhūjām |
apramādena cādaraḥ sadā teṣu kathaṁ bhavet || 6

brahmetthaṁ cintayitvā tu viṣṇoḥ śivasya cātmanaḥ |
śakrasya sarvadevānāṁ parimāṇaṁ guṇaṁ tathā || 7

savastraṁ vividhasthitamalaṁkārāstrasaṁyutaṁ |
manoramaṁ surupaṁ ca atyantasradṛśaṁ tathā || 8

sasavibhaktasarvāṅgaṁ pratyaṅgaṁ ca yathāyatham |
miśritena ca varṇena citrākāraṁ vinirmame|| 9

vilokya tāni citrāṇi netramūlāt pramoditāḥ |
sādhu sādhviti saṁpūjya praśaṁśasurvidhiṁ surāḥ || 10

ime devāḥ prasannāśca svaptākāraṁ ca lebhire |
adhiṣṭhānaṁ prabhāvaṁ ca kṛtavantastathā ime || 11

prāha saptasurān brahmā astu puṇyaṁ samāśritam |
adya prabhṛti sarvatra yuṣmākaṁ pratimāsu ca ||
nātra śaṅkā kṛthā naraḥ pūjayiṣyati vaḥ sadā || 12

śūddhayā dānena vidhivat tatparāyaṇamānasaḥ |
manuṣyeṣu ca yo nām bhavantaṁ pūjayiṣyati |
tasmai kāmasya siddhaye nairujyaṁ saṁpradāsyati || 13

nānā prakāraduḥsvapnāt dveṣagrastebhya eva ca |
sarveṣā rakṣaṇa kṛtvā pāpān nāśayati dhruvam || 14

dharmaśca sadṛśo bhāvyaḥ rakṣohānirbhaved dhruvam |
yaśovṛddhirbhaved viśve yuṣmākaṁ paripūjanāt || 15

lokapūjāvyavasthāyai pratimānāṁ yathāyatham |
nāmādikīrtanaṁ kārya stavapūjādikaṁ tathā || 16

pratimāṁ yāṁ pratidinaṁ puṇyātmā pūjayiṣyati |
tayaiva dīyate śāntistasmai bhaktāya sarvataḥ ||17

evaṁ vavatviti prāhurdevāḥ prasannamānasāḥ |
svīyaveṣaiḥ svacetasā svādhiṣṭhānaṁ samāgatāḥ |
itthaṁ pūjābhavad viśvavāsibhiste prapūjitāḥ || 18

parimāṇādikaṁ teṣāṁ mattaḥ śrutvā ca lakṣaṇam |
adya manuṣyalokeṣu pracāraya prayatnataḥ || 19

brahmaṇaśca mayā prāptaṁ vidyottamā ca lakṣaṇam |
aśeṣaṁ parimāṇaṁ ca tubhyamadya pradīyate || 20

trilokeṣu ca pūjyānāṁ sarveṣāṁ dehināṁ tathā |
pāpahānikaraṁ bhītenaśikam netramodakaṁ || 22

ādyutpannañca doṣeṇa hīnaṁ nānāśrayaṁ param |
vijānīhi kṣitīndra tvaṁ yaśorāśivivardhakam || 23

||iti citralakṣaṇe pūjotpattirnām dvitīyaḥ parivarttaḥ ||

tṛtīyaḥ parivarttaḥ

lokasya kāyamānaṁ māṁ svayambhūrupadiṣṭavān |
tat tathaiva pravakṣyāmi mānaṁ brūhi prajāsu ca || 1

devarākṣasagandharva siddhanartakakinnarāḥ |
vidyādharāśca nāgendrāḥ piśācapretakāyikāḥ || 2

ye bhavanti ca teṣāṁ vai bhūpatonāṁ tatastathā |
sarveṣāṁ prāṇijātānāṁ mānamidaṁ pravartate || 3

paramāṇuśca vālāgraṁ likṣā yūko yavo'ṅguliḥ |
aṣṭāṣṭaguṇavṛddhayā vai jñātavyamiti niścitam || 4

paramāṇubhiraṣṭābhirekaṁ vālāgramucyate |
vālāgrāṣṭau ca likṣā sā parimāṇajñakīrtitā ||
aṣṭalikṣā bhaved yūkaḥ aṣṭayūkā yavaḥ smṛtaḥ || 5

dvayaṅguloddharyaṅgulaṁ mānamaṅguliḥ syād yavāṣṭakam |
ardhāṅguliścaturyavā iti mānaṁ nigadyate || 6

vistārasya yathaivārtha āyāmena prakāśitaḥ |
tathārohasamucchrāyau paryāyavācinau matau ||
parimāṇānusareṇa varṇanoyāḥ kṣitau narāḥ ||7

ucchrāyaśca tathāyāmo rājñāṁ nyagrodhavṛkṣavat |
vistṛtaścakravartināṁ śruyatāṁ varṇyate mayā || 8

ucchrāyaścakravartināṁ svāṅguleḥ parimāṇataḥ |
aṣṭottaraśataṁ jñeyaṁ kadācinna parāṅguleḥ || 9

cakravartimahīpānāmucchrāyaparimāṇakam |
sākṣāt savarṇyate cātra purvoktaṁ vistareṇa ca || 10

mukhādīnāṁ parimāṇaṁ śruyatāmucyate mayā |
tribhāgena vibhaktaṁ ca samānena tathā budhaiḥ ||
civunāsālalāṭaṁ vā caturaṅgulamānakam || 11

āyāmo mukhabhāgasya bhaveccaturdaśāṅguliḥ |
urddhabhāge tvadhībhāge āyamo dvādaśāṅguliḥ ||
āroho vadanasyātra dvādaśāṅgulimānakaḥ || 12

ārohaścaturaṁgulamuṣṇīṣasya bhaved dhruvaṁ |
āyāmaśca tathaivāsya ṣaṛhaṅgulasamāyutaḥ || 13

śīrṣaṁ chatrasamākāramāyāmo dvādaśāṅgulaḥ |
dvātriṁśat tasya maṇdalamaṅgulīnāṁ hi mānataḥ || 14

karṇadeśasya cāyamo dvayaṅguliparimāṇakaḥ |
caturaṅgalisamucchrāyo randhramardhāṅgalaṁ matam |
karṇārandhrasya cāroha ekāṅgulo bhaved dhruvam || 15

samānatalavijñeyaṁ bhrupṛṣṭhakarṇayostathā |
akṣikoṣasya vistāraḥ karṇarandhrasamānakaḥ || 16

karṇasya luṭikāmānaṁ niścayena na kīrtyate |
bhruvorucchrāya āroho dvau yavau caturaṁguliḥ || 17

sarveṣāmeva śāntānāṁ bhruḥsyānnavaśaśāṅkavat |
narttane rodane krodhe cāpākārā bhavet sadā || 18

bhaye śoke ca bhruprāntāvunnatau kramikau smṛtau |
nāsākośāt samutthāya ardhalalāṭagāminau || 19

ekāṅgulistathā madhyaḥ romakoṣasamāvṛtaḥ |
bhrūmadhyāt keśaparyantaṁ mānaṁ dvayardhāṅgulaṁ matam || 20

bhrūvaḥ prabhṛti bhālāntaṁ mānaṁ syāccaturaṅgulam |
dvayaṅgulau hyakṣikoṣaḥ syānnetramadhyaṁ tathaiva tu || 21

cakṣuṣodvaryaṅgulāroha āyāmaścaikakāṅguliḥ |
tribhāgastārakā hyasya mukhamānasusammatā || 22

cakṣuvat tārakocchrāyo nayanaṁ cāpasannibham |
yad bhavettasya mānaṁ syād yavatrayapramāṇakam || 23

utpalapatranetrasya pramāṇaṁṣaṛyavaṁ smṛtam |
matsyodarasunetrasya mānamaṣṭayavaṁ bhavet ||24

padmapatranibhaṁ netraṁ navayavaiḥ susaṁnitam |
varāṭakābhanetrasya mānaṁ daśayavaṁ bhavet ||25

ucchrāyaśca tathāyāmo netrāṇāṁ varṇito mayā |
nirvikalpaṁ bhaveccakṣuryogināṁ cāpasannibhaṁ ||26

kāmināṁ ca tathā strīṇāṁ netraṁ matsyodaraṁ bhavet |
sāmānyānaṁ tu karttavyamutpaladalasannibham ||27

trastasya rudataścaiva padmapatranibhaṁ varam |
kruddhasya duḥkhitasyaiva varāṭakanibhaṁ sadā || 28

utpaladalavannetraṁ raktāntaṁ kṛṣṇatārakam |
dīrdhāgrasundaraṁ pakṣma śuvarṇaṁ sarlaṁ mṛdu || 29

gokṣīravarṇavatsnigdhaṁ prajāhitakaraṁ bhavet |
rājannetat vijānīyād yathā syāt netralakṣaṇam || 30

prasannapadmavannetrāṁ nīlavalkalasundaraṁ |
antarākhacitaṁ kṛṣṇaṁ tārakaṁ śrīsukhapradam ||
vilikhayet tathā dhīmān citraśāstreṣu dīkṣitaḥ || 31

netramānamidaṁ jñeyaṁ yathāśāstramudīritam |
ṣaṭtriṁśaddṛṣṭiniyamalakṣaṇamagra ucyate ||32

nāsāyāḥ punarārohaścaturaṅgulimātrakaḥ |
māsāgrasya samucchrāyau dvayaṅguliparimāṇakaḥ | 33

vakratāyāḥ puṭasyāpi āyāmaḥ svāṅgulidvayam |
nāsārandhrāgradeśasya mānavaṁ syāccaturyavam ||
ucchrāyaśca tathaivāsya yavadvayasamāyutaḥ || 34

deśasturandhrayormadhye dviyavaparimāṇakaḥ |
ārohaḥ ṣaṛyavastasya oṣṭha ekāṅguliḥ smṛtaḥ || 35

adharo'rdhāṅgulistasya gojī cārdhāṅgulistathā |
adharoṣṭhasya cārohaścaturaṅgulimānakaḥ || 36

oṣṭhāntau vimbavad raktau tathā cāpānukārakau |
alpocco mukhakoṇaḥ syāt sadāsusmitasaṁyutaḥ || 37

ucchrāye dvayaṅgulirhanurāyāme tryaṅgulistathā |
kaṇṭhasya tu samucchāyaścaturaṅgulakaṁ smṛtam |
utkṣiptakaṇṭhamānaṁ hi jñeyametanna cānyathā ||38

adhādhaḥ kaṇṭhadeśaya cāyamaḥ syād daśāṅguliḥ |
kaśo'ṣṭāṅgulakaṁ mānaṁ tataḥ sthūlastrimānataḥ || 39

kaṇṭhastribalibhiryuktaḥ karttavyaḥ kambuvat sadā |
unnataḥ pṛṣṭhabhāga syāt parimaṇḍalasaṁyutaḥ || 40

pañcāṅgulaṁ tu gaṇḍodhvaṁ adhaḥ syāt caturaṅgulam |
civukasya tathā mānaṁ caturaṅgulakaṁ matam || 41

āyāmo mukhagāgasya tathauṣṭhasya vivarṇitaḥ |
caturasraṁ mukhaṁ pūrṇaṁ prasannaṁ cārulakṣaṇam || 42

trikoṇā kuṭilā vṛttā naiva kāryā mukhākṛtiḥ |
krodhayuk roṣayuk caiva na mukhaṁ syāt kadācana || 43

īdṛśairlakṣaṇairyuktaṁ mukhaṁ vilikhayed yadi |
susampanno bhaviṣyati nara iha ca sarvadā || 44

śāntikāmi mukhaṁ yat syād dīrghaṁ ravartaṁ ca vartulam |
trikoṇaṁ vā prajānāñca sāmānyānāṁ bhaviṣyati || 45

taditarañca yad bhavet pūrvalakṣaṇasaṁyutaṁ |
tad vijñeyaṁ ca devānāṁ mukhasya mānamīdṛśam || 46

ata ūdhrvaṁ pravakṣyāmi kāyamāna vicārataḥ |
avikṣiptena gṛhyatāṁ manasā ca mahipate ||47

yat sthānaṁ kaṭideśasya udarasya tathāntarā |
jñeyaṁ tad dvayaṅgulaṁ nūnaṁ skandhāyāmaḥ ṣaṛaṅgulaḥ ||

daighrye tvaṣṭāṅgulo jñeyo vakṣastu dviguṇaṁ smṛtam || 48
ārohaḥ syāttu meṭrasya ṣaṛaṅgulapramāṇakaḥ |
aṣṭādaśāṅgulā śroṇī ārohe kathitā budhaiḥ || 49

jatruto hṛdayaṁ yāvanna kuṭilaḥ pradeśakaḥ |
hṛdayān nābhirandhrakaḥ bandhuraḥ syānna saṁśayaḥ |
nābhito meṭraparyantaṁ samānaṁ ca bhaved dhruvam || 50

caturdaśāṅgulaṁ kaṭyā nābherardhāṅgulaṁ matam |
mānaṁ ca dahiṇāvarttaṁ yavaikaṁ cucukaṁ smṛtam || 51

maṇḍalo dvayaṅgulo vāsaḥ punardeyaṁ cucūkayoḥ |
bandhanaṁ ca pradātavyaṁ kaṭideśasya śobhanam ||
kaṭideśastathā nābheradhastāccaturaṅguliḥ || 52

āyāme dvayaṅgulaṁ meḍhraṁ vāsteyastu ṣaṛaṅgulaḥ |
bṛṣaṇau nātilambau hi sthūlatve saptakāṅgulau ||
parivṛtiḥ samānaiva ucchrāye caturaṅgulau || 53

medaṁ ṣaṛaṅgulaṁ proktamantaraṁ svodarānnanu |
ṣaṛaṅgulaṁ bhavet mānaṁ lakṣaṇajñairudāhṛtam || 54

āyāmo jaṅghayoḥ kāryaḥ pañcaviṁśatiraṅgulaḥ |
ūrborgulphayoścaiva mānaṁ syāccaturaṅgulam || 55

prāntadvayaṁ ca jaṅghāyā vikhyātaṁ citrakarmaṇi |
gulphalagnapradeśasya āyāmaścaturaṅgulaḥ |
tathaiva madhyadeśī hi āroheṇa ṣaṛaṅguliḥ || 56

ñyaṅgulaṁ jānubhāgasya āyāme na tathārohe |
jaṅghādvayasya tasyordhaṁ mānamaṣṭāṅgulaṁ matam |
jaṅghayoḥ sthūlatāmānaṁ bhaved dvādaśakāṅgulam || 57

jaṅghāgramunnataṁ kuryāt puṣṭamasina saṁyutam |
mṛdu karikarākāraṁ na kāryaṁ viṣamaṁ kvacit || 58

gulphādeśastathā nāṛī pragacchannaiva dṛṣṭitām |
jaṅghāyāḥ paścimo bhāgaḥ suvṛtto'lponnatau bhavet || 59

ucchrāyeṇa tu pārṣṇīnāṁ mānaṁ pañcāṅgulaṁ matam |
āyāmastryaṅgula proktaḥ pādau caturdaśāṅgulau || 60

caturaṅguliko'ṅguṣṭo raktaṁ pādatalaṁ smṛtam |
raktapadmāgrasādṛśyaṁ lākṣārasasamāyutam || 61

cakrādilakṣaṇairyuktaṁ parasparasamīpagam |
pādasya bandhanaṁ syāttu dvayuṅgulaṁ bhūpadeśagam || 62

cakravartimahīpasya haṁsavaccaraṇau matau |
bhūsparśau jālavṛddhau ca aṣṭāṅgulipramāṇakau || 63

kūrmapṛṣṭasamākārau sundaracinhasaṁyutau |
pañcāṅgulisamāyāmau darśane sumanoharau || 64

kaniṣṭikāttayārohaḥ ṣaṛaṅgulisusaṁyataḥ |
aṅguṣṭasya tathāyāmo dvayaṅgulaḥ sādhuniścitaḥ ||
parivṛtiḥ ṣaṛaṅguliḥ ārohe caturaṅguliḥ || 65

agre samunnatā kāryā dīrghā aṅgulayastathā |
aṅguṣṭhāpekṣayā sthūlā ārohe tryaṅgulā matāḥ || 66

ekaikāṅgulito nyūnāḥ sarvāḥ syuḥ kramikāgatāḥ |
kaniṣṭhikāsamucchrāyaparīivṛttirdviraṅguli || 67

aṅgulīnāṁ tu jālāśca sannaddhāḥ sundarāstathā |
nāḍyaviṣamasaṁpuṣṭā asthi cādarśanaṁ gatam || 68

nakhāścārdhaśaśāṅkavat raktimāḥ snigdhavarṇakāḥ |
sinduraliptasarvāṅgāḥ pradiptāgniśikhā yathā || 69

candrakāntasamujjvalāstathā suspaṣṭasaṁyutāḥ |
avraṇā mṛdavaḥ pūrṇāḥ yavamānena pūritāḥ || 70

aṅgulistu tribhāgaḥ syāt spaṣṭā vṛddhāṅgulistathā |
tasyāḥ pārśvāṅgulermadhye sthānamardhāṅgulaṁ matam || 71

gulphādeśādadhobhāgaścaraṇamitisaṁjñitam |
taccaraṇasamucchrāyaḥ caturaṅgulako mataḥ |
itthaṁ caraṇamānaṁ syān mayā proktaṁ sucintitam || 72

hastasya lakṣaṇānyatra śruyantāṁ kathayāmyaham |
talaṁ saptāṅgulaṁ dīrghaṁ vistāraḥ pañcakāṅguliḥ || 73

madhyāṅguleḥ samucchrāyaḥ pañcāṅgulaṁ prakīrtitam |
tarjanyā nyūnatā bodhyā parvārdhena susaṁmatā || 74

anāmikāṅgulīmānaṁ tadūvadeva bhaved dhruvam |
kaniṣṭhikāpyadīrghā syāt pārśvāṅgulikramādanu ||75

aṅguṣṭhasya sadorahoścaturaṅgulako mataḥ |
aṅguṣṭhe dve tu parvaṇī samenaika yavo bhavet || 76

tasyādho māṁsapiṇḍaśca tryaṅgulisammito bhavet |
aṅguṣṭhasya pramāṇaṁ tu navayavakasammatam ||
āyāmo'ṣṭayavaḥ kārya ārohastu yavā nava || 77

aṅguṣṭhāttu caturbhāgā naddhā jālakramādanu |
nakhā raktāstathā svacchāḥ śuktivaccārutānvitā || 78

aṅguṣṭhapārśvamāṁsaṁ tvāyāme aṅgulakaṁ matam |
aṅguṣṭhāntaṁ tu karabhāt saptāṅgulamānakam || 79

āyāmaśca tathārohaḥ kramādaṅguṣṭhayormithaḥ |
yathāśāstramupanyastaḥ śubhaṁ kāryaṁ vicārayan || 80

parvārdhena mitāḥ kāryā nakhāḥ sūkṣmāṁ nakhāgrakāḥ |
sṛṣyante ca yavādṛśaḥ parvatarekhā tvadoṣabhāk || 81

parvaṁ dīrghaṁ ca vṛtaṁ ca karatalasuśobhanam |
talau padmasamau raktau karasyaivaṁ vidhānataḥ || 82

akuṭilamavakraṁ ca gambhīraṁ sūkṣmakaṁ tathā |
rekhātrayaṁ kare proktaṁ raktavarṇaṁ suśobhanam || 83

śrīvatsacakracinhasvastilakṣaṇa samanvitam |
kārpāsasparśakomalaṁ kṣaumasūtramanoharam |
sukhadaṁ cāru susparśaṁ kuryāt karatalaṁ śubham || 84

samantān māṁsapūrṇaṁ vai nāṛī dṛśyā kadāpi na |
hastapṛṣṭhaṁ sadā snigdhamunnataṁ ca bhaved dhruvam |
sūkṣmā aṅgulijālā hi sundaraṁ ca tanustathā || 85

utpalābhaḥ sadā rakto nāgendrābhogasannibhaḥ |
nakhodarastanuḥ snigdha unnataḥ karaśobhakaḥ || 86

ārohāyāmamānaṁ tu hastasya gaditaṁ mayā |
bāhūnāṁ mānamārohaṁ dhīman śṛṇu vadāni te || 87

ubhayostu tathā bāhvīrmānaṁ kuryād yathāvidhi |
ṣaṭtriśakaṁ pramāṇaṁ vai aṅgulīnāṁ vidhānataḥ |
aṣṭādaśa prabāhośca bāhoścāpi tathaiva ca || 88

skandhāgrasya bhaven mānaṁ ṣaṛaṅgulisusammatam |
āyāmo bāhubhāgasya jñeyaṁ pañcāṅgulaṁ sadā || 89

aṅgulirmaṇibandhaḥ syāt pravāhū caturaṅgulī |
viśālo varttulākāraḥ suspaṣṭoraṁśo bhavet punaḥ || 90

āroho bhujayoryastu bhavedaṣṭādaśāṅguliḥ |
ākarādaṣṭacatvāriśat nāṛiparva tvadṛśyakam || 91

hastau na jānuparyantau dīrdhau sūkṣrmau ca sundarau |
samantān māṁsapūrṇau ca bhavetāmānapūrṇyataḥ || 92

gopucchāgrasamau tāvat krameṇoccāvacau punaḥ |
bāhū daṇḍāyamānasya jānuparyantagāminau || 93

tasmād rājendra hastena jānuprāpta udīryate |
bāhuprabāhumānāni āyāmārohaḥ kīrttitaḥ || 94

punaragre pravakṣyāmi lakṣaṇāni śubhāni vai |
yāni purvaṁ na coktāni tāni tubhyaṁ vadāmyaham || 95

keśānāṁ prāntabhāgāttu sthānaṁ kaṭyāsthivistṛtam |
parimāṇaṁ ṣaṛaṅgulaṁ jñeyaṁ sadā mahīpate |
skandhasthalasya mānaṁ hi ṣoṛaśāṅgulisammitam || 96

ārohastasya madhyasya daśāṅgulaṁ bhaved dhruvam |
āyāme cāṅgulīnāṁ hī saṁkhyā yāyād navānvitā || 97

skandhadeśasya madhyāṁśa ārohāyāmaśobhitaḥ |
pṛṣṭhamadhyaḥ ṣaṛaṅgulirurdhve tu viṁśatirmatā || 98

madhyasya dvayaṅgulāyāmaḥ pṛṣṭhaṁ bhāgena sundaram |
puruṣāṇāmidaṁ mānaṁ strīṇāṁ bhāgaḥ sa eva hi |
māṁsapeśyalpasaṁyutaḥ sarvaśarīraśobhanaḥ || 99

nitambapārśvamānaṁ syāt ṣaṛaṅgulisamanvitam |
caturasraṁ ca vijñeyaṁ maṇḍalānvitanimnagam || 100

sthānāt tasmāt samārabhya śroṇīsīmāsamīpagam |
caturaṅgulaṁ sthānaṁ syāt pāyustu dvayuṅgulaṁ matam || 101

nitambadeśa ārohe cāṣṭāṅgulisamanvitaḥ |
nātisaṁkocamāpanna āyāmaḥ saptakāṅguliḥ |
cārumaṇḍalayuktaśca nātiprasārito bhavet || 102

ārohāyāmayoḥ sarvaṁ lakṣaṇaṁ śāstrasammatam |
nirdiṣṭaṁ cāvabodhārthaṁ punaratra pravakṣyate |
avikṣiptena cittena gṛhyatāṁ lokahetave || 103

dantaśirasya lobhānāṁ vyavasthā kramaśo yathā |
varṇasya lakṣaṇaṁ caiva devamukhe na dīyate || 104

sugrathitāḥ samādantāḥ snigdhavarṇāḥ sutīkṣṇakāḥ |
dadhimuktābjavacchuklāḥ svacchāḥ śvetā himā iva || 105

catvāriśacchubhā dantāḥ śvadantaiśca suśobhitāḥ |
ārohe triyavā jñeyā āyāme yavayugmakāḥ || 106

dantamūlaṁ tathā tālu jihvāsīmā ca lohitam |
jātīkusumasaṁkāśaṁ śvadantābhaṁ suśobhanaṁ || 107

śvadantānāṁ yavārdhena vṛddhiḥ kāryā vicārayan |
tīkṣṇāgraparimaṇḍalaṁ mṛdu mṛṇālatantuvat || 108

padmapatrapratīkāśaḥ komalaṣca sulakṣaṇaḥ |
sthirataḍīnnibho jihvādeśaḥ spaṣṭaṣca raktimaḥ |
navārdhaparṇavaccāruḥ mukhe vai vitato bhavet || 109

airāvatasya vṛṁhatī hayarājasya nādavt |
megharavasya gambhīrā vāṇī proktā sulakṣaṇā || 110

jālarekhānibhā keśāḥ śiro'laṁkaraṇaṁ gatāḥ |
indranīlasabhāḥ kṛṣṇā bhramarāñjanasannibhāḥ || 111

mayūrakaṇṭharomābhāḥ kokilābhāḥ śiroruhāḥ |
nīlā dedīpyamānāśca pṛṣṭamūlasamāgatāḥ || 112

sundarā dakṣiṇāvarttāḥ keśariṇaḥ saṭāprabhāḥ |
jālarekhāṅkitāḥ koṇāḥ keśacūṛā manoharāḥ || 113

bāhumūlopajaṅghāsu nāsākarṇamukheṣū ca |
jaṅghāsu kaṇṭhagaṇḍeṣu keśā na syurmahātmanām || 114

mṛdusūkṣmaistathā snigdhairjālarekhaiḥ suśobhanaiḥ |
keśānāṁ parimaṇḍalairnīlāñjanasamaprabhaiḥ |
vakṣasthalaṁ nṛpāṇāṁ ca śobhitaṁ syāt sulakṣaṇam || 115

devabhūtamanuṣyāṇāṁ mukhe śmaśru na roma ca || 116

eteṣāṁ devadehastu romabhiḥ parivarjitaḥ |
ṣoṛaśavarṣapūrakaṁ śarīraṁ taddhi kathyate || 117

surāṇāṁ keśajālaṁ tu sūkṣmalateva saṁgatam |
nīlaṁ cakṣurmanogrāhi sarvasattvasukhapradam || 118

jambunadasamāhṛtataptakāñcanavarṇakaḥ |
dediṣyate ca deho'sya pātacampakapuṣpavat || 119

kamaladalakoṣasya prākāra iva tṛptidaḥ |
uttamaḥ puruṣo jñeyaḥ lakṣmaṇaṁ cakravarttinaḥ || 120

gajarājagatiryasya vṛṣarājapadonnatiḥ |
mṛgarājagatisthairyaṁ lakṣmaṇaṁ cakravarttinaḥ || 121

gajavat sabalau pādau vṛṣavadānanaṁ kharam |
vadanaṁ siṁhavad rājahaṁsatejaḥ samāyutaḥ || 122

veśadṛśāṁ gatiṁ cātha atikramya ca sarveṣām |
dṛśyavannāṭakasyeva bhūtānāṁ śikṣako ca manoramā || 123

sugandhastvak kṛśaḥ snigdhī darpaṇasparśakomalaḥ |
dhūlimalena nirliptaḥ lakṣaṇaṁ cakravarttinaḥ || 124

pradīptamaṇisaṁkāśaḥ shvetavastrasuśobhitaḥ |
samantāt kiraṇāvṛtaḥ rājā lekhyaḥ kṛśaḥ sadā || 125

nirmedhaśaśiccāru prabhāmaṇḍalamaṇḍitam |
śarīraṁ yasya rājendra lakṣaṇaṁ cakravarttinaḥ || 126

mukhaṁ candradṛśaṁ shvetaṁ sugnigdhaścāparaḥ śaśī |
dharāpṛṣṭe samāyāta ittthaṁ mādhuryamaṇḍitaḥ |
bhrūvoḥ kaṇṭhasya bhālasya saundaryaṁ hi mukhasya ca || 127

ākuñcitamṛdusnigdha cārukeśaḥ sunāsikaḥ |
cārvoṣṭaṁ raktimāpūrṇaṁ svacchā dantā nabho yathā || 128

dīrdhottama ca pakṣma hi snigdhavarṇaṁ bhavettathā |
nīlaṁ kṛṣṇaṁ dīrghaṁ ca cakṣuḥ syāt sumanoharam |
bhrūvau dīptau sadā jñeyau netrānandavidhāyakau || 129

phullāravindakoṣasya karṇayorākṛtiḥ samā |
īṣadromau manoharau śarīrāṅgavibhūṣaṇau || 130

karṇayorluṭike tasya kramike śaṅkhasannibhau |
baddhaskandhau supūrṇāṁśau śobhanamaṅgamaṇḍalam || 131

māṁsapurṇaṁ bhaved vakṣaḥ tasyāroho yathākraman |
āyāmaśca yathāyathaṁ cānupūrvyeṇa saṁgatā || 132

siṁhodaravad vijñeyā kaṭirāvartitā bhavet |
dakṣiṇāvartino nābhiḥ gabhīrā syād yathāyatham || 133

airāvatasamānau hi liṅgakoṣaśca sundaraḥ |
samantāt maṇḍalākāraḥ ābhādṛśyā bhaved dhruvam || 134

gajaśuṇḍasamā jaṅghā anukrameṇa vistṛtā |
mukheṣu connatā jñeyā gulpho'dṛśpo bhavet tathā || 135

subaddhāṅgulisundarau kūrmavat māṁsalau tathā |
ardhacandraprabhāyuktāṅgulicakrapadāṅkitau |
pādapṛṣṭomṛdū syātāṁ komalau haritau smṛtau || 136

vṛṣapucchānupūrviyau dīrghāṅguliyutau karau |
nakhaprabhāsamujjvalau prasāre dīrghakau yathā |
parimaṇḍalasampannau cakrarekhāsvalaṅakṛtau || 137

campakadāmaśobhitaḥ marālagātasaṁyutaḥ |
susaṁsthānasamāpannaḥ sarvāṅgeṇa manoharaḥ || 138

tejasvī vīryavān rājan cakravarttī sadā bhavet |
āyāmārohamānaṁ ca lakṣaṇaṁ tadudāhṛtam || 139

dehe jaṅghopajaṅghā ca bhṛśaṁ vikaśitā bhavet |
suhastau caraṇau syātāṁ tathā parva ca dṛśyate || 140

kukṣipṛṣṭe suśobhite mukhaṁ cāru manoharam |
śobhitau ca bhujau syātāṁ deho mānānvito bhavet || 141

aṅgāni māṁsapūrṇāni śarīraṁ snigdhavarṇakam |
priyaudāryaguṇā yatra rājahaṁsagatistathā |
cārudeho mahīpateḥ cakravartī sa ucyate || 142

prasiddhaiḥ śilpibhiḥ kāryaṁ mānavāṅgeṣu yatnataḥ |
śīrṣakaṣṭabhujadvandaṁ jaṅkhopajaṅkhasundaram || 143

upayukteṣu sarveṣu parimāṇaṁ tu yatra ca |
tatra svāṅgulinā kāryaṁ mānaṁ sarvatra karmaṇi || 144

ārohāyāmapīnatve pratyaṅgaṁ samatāṁ bhajet |
vidhinā parimāṇena sammpannaṁ śobhitaṁ bhavet || 145

atī jñeyañca paṇḍitaiḥ parimāṇaṁ suyatnataḥ |
parimāṇapratiṣṭānopāyādibhirvihīnā yā |
pratimā sā parityaktā suradevaiḥ sadā khalu || 146

piśācā rākṣasā bhūtā vasanti tvarita tathā |
śobhitān nāśayanti ca amaṅgalaṁ bhayaṁ bhavet || 147

ārohāyāmayoḥ rājan lakṣaṇaṁ kathitaṁ mayā |
yathecchaṁ vai vibhaktavyaṁ caturbhāgena mukhyataḥ || 148

valiḥ sūryo dāśarathiḥ rāmo manusutastathā |
parimāṇānusāreṇa kāryo bhinno vīcakṣaṇaiḥ || 149

bhadrau dvayaṅgulinā nyūno mālavyaścaturaṅguliḥ |
rucako'ṣṭāṅgulinyūnaḥ śaśakaśca daśāṅguliḥ || 150

apriyo na yathā yāyāt tathā mānaṁ vicārayet |
kiṁ bhavet parimāṇena śarīraṁ cedasundaram || 151

caturṇāṁ ca tathā rājñāṁ parimāṇasya lakṣaṇam |
brahmaṇā tu pradarśitaṁ vistaraṁ bravīmi te || 152

sarvasya lekhane granthe vistāro bhavati dhruvam |
tena trasyanti cālpajñā aśrutikāraṇān nanu || 153

nārīpuruṣayoḥ satsu lakṣaṇeṣu prajāpatiḥ |
dvādaśeṣu sahasreṣu pañcaśa upadiṣṭavān || 154

naralakṣaṇayukteṣu tathānirdiṣṭapañcadhā |
tubhyaṁ pradarśayāmi ced gacched grantho viśālatām || 155

cakravarttinarendrasya lakṣaṇaṁ kathitaṁ mayā |
vidhivat parimāṇañca anyapradarśanena kim |
uttamapuruṣādīnāṁ tena mānaṁ dhruvaṁ bhavet || 156

ato buddhayā suniścitya bhadro lekhyo vicārayan |
sa ca bhavet samucchrāye ṣaḍuttaraśatāṅgulam || 157

rucakasya samucchrāyaḥ śatasaṁkhyānvito bhavet |
mālavasya tathocchrāyaścatuḥśatamitāṅgulam || 158

śaśakasya samucchrāye saṁkhyāṣṭanavatiḥ sadā |
aṅgulīnāṁ vidhātavyā citraśāstraviśāradaiḥ || 159

ato'nyomānaniyamo na bhūto na bhaviṣyati |
uttamādhamamadhyamapradhānānāñca bhūbhṛtām |
ārohāthāmamānaṁ tu ālocyātra pradarśinam || 160

ucchrāyo navarat strīṇā jñeya ekāṅguliḥ kṛśaḥ |
ekāṅgulistathā rājñā puṣṭirjñeyā mahāmate || 161

nābhijaṅkhopajaṅkhānāṁ laṭikaṇṭhopajānunām |
śīrṣadeśasya vakṣasastathā caraṇayornṛpa |
āroho nāpriyo yāyāt tathā mānaṁ vidhīyatām || 162

uttamamadhyamādhamamānaṁ tu kramikaṁ matam |
ārohaśca tathāyāmaḥ teṣāmatra pradarśitaḥ |
nārīṇāṁ parimāṇaṁ ca sarvaṁ śṛṇu krameṇa hi || 163

rājñāṁ yathā pradarśitaṁ mānena ca tathāyutam |
samyag vicārya śemuṣyā bahusthānapratiṣṭhitam || 164

samadvibhāgasampannaṁ niṣkuṭilaṁ sukomalam |
lekhyaṁ citramaninditaṁ netraprītivivarddhanaṁ || 165

iti citralakṣaṇe parimāṇo nāmstṛtīyaḥ parivartaḥ |

yāvat brahmaṇaḥ parimāṇalekhayaḥ samāptaḥ |

Technical Details

Text Version: 

Romanized

Input Personnel: 

DSBC Staff

Input Date: 

2008

Proof Reader: 

Milan Shakya

Supplier: 

Nagarjuna Institute of Exact Methods

Sponsor: 

University of the West

Chapter: 

0