antarvyāptisamarthanam

antarvyāptisamarthanam|

om namo buddhāya|

iha sattvamarthakriyākāritvaṁ taditarasattvalakṣaṇāyogāt| tacca kramayaugapadyābhyāṁ vyāptaṁ parasparavyavacchedalakṣaṇatvādanayoḥ| prakārāntareṇa karaṇāsambhavāt| kramayaugapadye cākṣaṇikatve na staḥ| pūrvvāparakālayoaravicalitaikasvabhāvasya karttṛtvākarttṛtve virudvadharmmadvayāyogāt|

tatra na tāvat kramaḥ kramāṇāmekaikaṁ prati pūrvāparakālayoḥ karttṛtvākarttṛtvāpatteḥ| evaṁ sarvvakramābhāvāt kevalaṁ sakalakāryyayaugapadyamavaśiṣyate| tatra ca sphuṭa taraḥ pūrvvāparakālayoḥ karttṛtvākartṛtvaprasaṅgaḥ| virudve ca karttṛtvākarttṛtve ekadharmmiṇi na sambhavataḥ| ekasvabhāvaśca tāvatkālamakṣaṇika iti sidva etasmin kramayaugapadyayorayogaḥ| tadevamakṣaṇike vyāpakānupalabdhyā niṣidvaṁ sattvaṁ kṣaṇika evā[va] tiṣṭhate iti kṣaṇikatvena vyāptaṁ | tattena vyāptaṁ yat yatra dharmmiṇi sidhyati tatra kṣaṇikatvaṁ prasādhayati| idamevedānīṁ vicāryyate| keyaṁ (kveyaṁ) vyāptigrahītavyā dṛṣṭāntadharmmiṇi sādhyadharmmiṇi vā| kecidāhuḥ| dṛṣṭāntadharmmiṇyeva dhūmavat| anyathā sādhanavaiphalyaṁ syāt| ubhayadharmmasidvi(dve)ranāntarīyakatvāt vyāptisidveḥ| nahi mahānasasidvāyāmagnidhūmayorvyāptau punaragnisidvaye dhūmaliṅgamanviṣyata iti| tathāhi|

dṛṣṭānte gṛhyate vyāptirdharmmayostatra dṛṣṭayoḥ|

hetumātrasya dṛṣṭasya vyāptiḥ pakṣe tu gamyate||

sā ca sarvvopasaṁhārāt sāmānyamavalambate|

tasya dharmmiṇi vṛttistu pratīyetānumānataḥ||

pratyakṣadṛṣṭayorvanhidhūmayoḥ kāryyakāraṇabhāvasidvau tayorvyāptisidviriti pratyakṣasidve vanhau yuktamanumānavaiphalyam| naivaṁ vyāptisidveḥ prāk pramāṇāntarasidvaṁ dharmmiṇi kṣaṇikatvam| sādhanadharmmameva tu kevalamanupaśyanto viparyyaye bādhakapramāṇavalāttasya kṣaṇikatvena vyāptiṁ pratīmaḥ| tattataḥ sādhanavaiphalyam| vaiphalyameva, kṣaṇikatvavyāptasya sattvasya tathātvena dharmmiṇi pratītau kṣaṇikatvasyāpi pratīteriti cet| na | sarvvopasaṁhāravatī hi vyāptiḥ sādhyasidveraṅgam| tadiyamanapekṣitadharmmiviśeṣaṁ sādhanadharmmamātramavalambate| tadyathā| yatra dhūmastatrāgniriti| na punaryatra mahānase dhūmastatrāgniriti| evamihāpi yat sattatkṣaṇikamiti vyāptipratītau sādhanadharmmasyāpi dharmmiṇi sattvaṁ nāntarbhavati| kiṁ punaḥ sādhyadharmmasya| tasmāt sattvasāmānyasya sādhanadharmmasya pakṣadharmmatvaṁ vyāptiścaikaśaḥ pratipādya tadubhayasāmarthyāt sādhyadharmmasya dharmmiṇi vṛttiḥ pratīyata iti kuto'numānavaiphalyaṁ| yadyevaṁ vyāptipratītāvasati dharmmiṇi parāmarśe sādhyadharmmiṇi vyāptigrahaṇamiti| kutaḥ| tatra dṛṣṭasya sattvasya vyāptipratīteḥ| yathā mahānasadṛṣṭāgnidhūmayorvyāptigrahe dṛṣṭāntadharmmiṇi vyāptigrahaṇamucyate| na hi vyāptigrahaṇe mahānasaparāmarśo'stītyuktaṁ| nanu vyāptipakṣadharmmatvayorekaśaḥ pratītāvapi yasyaiva pakṣadharmmatvamavagatantasyaiva sādhyena vyāptiravasiteti sāmarthyāt sādhyasattākathanamavaiyarthyaṁ sādhanasya|

nanu na pakṣadharmmatvagatiḥ sādhyagatiḥ sādhyadharmmasaṁsparśāt| nāpi vyāptipratītireva sādhyasidviḥ| sāmānyālambanatayā dharmmiviśeṣeṇa dharmmayoranavacchedāt| anyathā viśeṣayorvyāptiprasaṅgāt tadayaṁ vyastaviṣayaḥ sāmarthyāditi hetunirddeśaḥ| atha hetostrairūpyaparicchedasāmarthyāt sādhyapratītirutpadyata ityucyate| na tarhīdānīṁ vyarthohetuḥ| svarūpaniścayena sādhyaniścayopajananāt| na hi kvacidiyattādhikaṁ liṅgasya karttavyamastīti|

api ca gṛhīte pakṣadharmmatve sambandhe ca smṛte anumānaṁ bhavadbhiriṣyate| tadvadantarvyāptāvapīṣyatāṁ| na hi bahirvyāptivādināmapi vismṛtāyāṁ vyāptau anumānapravṛttirasti| tatra yasyaiva pakṣadharmmatvamavagataṁ tasyaiva sādhyadharmmeṇa vyāptismṛteḥ kinna sarvvānumānavaiyarthyaṁ| sādhyadharmmiṇo'parāmarśeṇa vyāpteḥ smaraṇāditi cet| sādhyadharmmiṇi dṛṣṭasyaiva vyāptismaraṇe kathaṁ sādhyadharmmiṇo'parāmarśaḥ| sāmānyālambanatvādvyāpteḥ| sādhyadharmmino'navacchedāditi cet| nanu tatra dṛṣṭasya kathaṁ tenānavacchedaḥ| tenāvacchinnasya vā asādhāraṇatvāt kathaṁ vyāptiḥ| ayogavyavacchedena viśeṣaṇānnāsādhāraṇateti cet tathāpi kinna sādhyadharmmī parāmṛśyate| yatra yatra parvvate dhūmastatra tatrāgniryathā mahānasa iti sāmānyālambanāyāṁ vyāptau dharmmiviśeṣaparāmarśasyānaṅgatvāditi cet yuktametat sādhyadharmmiṇā hyayogavyavacchedaḥ sādhanadharmmasya rūpāntarameva pakṣadhammatvākhyaṁ| na tvayaṁ vyāpteraṅgaṁ | tamantareṇāpi vyāpteḥ sāmānyālambanāyāḥ paricchedaparisamāpteḥ kathamanyathā dṛṣṭāntadharmmiṇi vyāptigrahaṇavārttāpi tadedānīṁ pakṣadharmmatvāyogāt pakṣadharmmatvāgrahaṇāt; pakṣadharmmatvagrahaṇe vā tadaiva sādhyamapi sāmarthyādasidvaṁ sidvamiti sarvvānumānavaiyarthyaprasaṅgaḥ| paścātkālabhāviliṅgajñānamapi ca smṛtireva syāt na pramāṇaṁ| tasmāt vyāpteranaṅgatvāt pakṣadharmmatvaṁ vyāptigrahaṇe sadapi nāntarbhavatīti pṛthaggṛhītasmṛtayoḥ pakṣadharmmatvavyāptyoḥ sāmarthyādanumeyagatirutpadyate iti| evamavaiyarthyaṁ sādhanānāmeṣitavyam iti mānaphalatvāt| tadvat pṛthagmūtayoḥ pakṣadharmmatvavyāptyoḥ sāmarthyādanumānotpattirantarvyāptāvapi kinneṣyate| tadiṣṭau vā kathaṁ sādhanavaiyarthyaṁ| trairūpyagatisāmarthyādanumeyagatiriti hi tadupādānaśaktireva sāmarthyamucyate, na tu trairupyapratīterantarbhāva iti sarvvaṁ samānaṁ| na sarvvaṁ samānaṁ| antarvyāptau hi vyāptiṁ prati gatyaiva pakṣadharmmatvamavagataṁ anavagate pakṣadharmmatve vyāpterapyanavagateḥ| tato vyāptipūrvvake sādhanavāhye pakṣadharmmavacanamanarthakamanantavyāptau| naivaṁ bahirvyāptau bahireva vyāptigrahaṇāt| atrāha,-

"yena tena krameṇātra prayukte sādhane sati|

avetyaṁ pakṣadharmmatvaṁ paścādvyāptiḥ pratīyate||

pratyakṣa iva dṛṣṭānte tatra setyanyathā kathaṁ|

dvau dṛṣṭvā vidma iti ced vyāpteḥ prāk dvayadṛk kathaṁ||"

vyāptipakṣadharmmatve hi svavākyābhyāṁ yena tena prayuktābhyāṁ sūcyete na tu sākṣāt pratīyete| vācaḥ svayamapramāṇatvāt| yadāha,-

śaktasya sūcakaṁ heturvaco'śaktamapi svayamiti| sūcitayo'stu tayoḥ sattve hetau prathamatarapakṣadharmmatvaviṣayameva pramāṇamabhimukhībhavatu| tena pramāṇena dharmmiṇi sidvasya sattvasya paścādvyāptiḥ pramāṇāntareṇa gṛhyata iti kasya vaiyarthyamiti| pratyakṣe'pi dṛṣṭāntadharmmiṇi prathamaṁ heturgṛhyate paścādvyāptirityeṣa eva kramaḥ anyathā dṛṣṭāntadharmmiṇi vyāptirgṛhītetyetadeva na syāt| dṛṣṭāntadharmmiṇyadṛṣṭasyaiva hetorvyāptigrahaṇāt| yadyevaṁ sādhyadharmmo'pi vyāptigrahaṇādhikaraṇe dharmmiṇi grahītabya eva yathā vanhidhūmayoriti cet| na| tatra dṛṣṭasya hetorvipakṣe bādhakavṛttimātrādeva vyāptisidveḥ| jñātaścaivaṁ na khalu vyāptigrahaṇāt prāk kṣaṇikasya kvacidapi sidvirasti tasyānumeyatvāt | asidvāyāñca vyāptāvanumānāpravṛtteḥ| sādhanāntarasya ca tadarthamananusaraṇāt| anusaraṇe'pyanavasthā syāt| avasthāne tāvat prayāsasya vaiyarthyāt| viaparyyaye vyāptibalādeva vyāptisidveravighātāt| vanhidhūmayostu nādṛṣṭayoḥ kāryyakāraṇabhāvasidveḥ| tatsidvau na vipakṣe bādhakavṛttiriti dvayadarśanavyapekṣā ? vanhidhūmayorvyāptisidviḥ sattvakṣaṇikatvayostu naivaṁ| yathoktanyāyena vyāptisidveḥ| tasmāt sattvamātrasya tatra dharmmiṇi sidvasya bādhakavaśādvyāptiḥ setsyatītyeṣitavyaṁ| tadvadantarvyāptāvapi| te ime vyāptipakṣadharmmatve svasvapramāṇavyavacchedyasādhanavākye na tu kevalaṁ sūcayitavye| na cānyataravākyena śakyamubhayaṁ sūcayitumiti kuto'nyataravākyavaiyarthyaṁ||

ekasyaiva hi dharmmasya kramātrairūpyaniścayaḥ|

vismṛtāvanumābhāvāt tat kiṁ vyarthānumākhileti||

api ca saṁgrahaślokaḥ,-

bādhakāt sādhyasidviścedvyartho hetvantaragrahaḥ|

bādhakāttadasidviścedvyartho dharmmyantaragrahaḥ||

yadi hi dharmmiṇi vyāptiḥ sidhyantyeva sādhyasidvimantarbhāvayati| nanu lābha evaiṣaḥ| byāptiprasādhakādeva pramāṇāt sādhyasidveḥ sattvahetvapāśrayaṇaprayāsasya nirasanāt| na hi vyasanamevaitalliṅgāntarānusaraṇaṁ nāma| atha na vyāptisādhakāt sādhyasidviḥ| na tarhyantarvyāptau hetuvaiyarthyamiti kimakāṇḍakātaratayā bahu taramāyāsamāviśasi| dvayaṁ hi bhavataḥ sādhyaṁ dṛṣṭāntadharmmiṇi vṛttiḥ sādhyadharmmiṇi ca| yathākramaṁ byāptipakṣadharmmatvayoḥ sidvyarthaṁ| nanu yadā pratiniyate dharmmiṇi vivādaḥ, tadvahirbhūte ca dharmmiṇi vyāptigrahaṇaṁ tadānīṁ bhavedvaiyarthyaṁ| yadā tu vastumātre vivādaḥ tadā sarvvavastuṣu hetorvṛttistvayāpi sādhyā mayāpi ceti katamasmin dharmmiṇi hetorvṛttisādhanaṁ mama vyarthaṁ bhaviṣyati| kathamidānīṁ bahirvyāptirvivādādhikaraṇaṁ bhūta evānyatamasmin vyāptisādhanāt| tāvanmātralakṣaṇatvācca sādhyadharmmiṇaḥ| bādhakaṁ pramāṇaṁ pravarttamānamantargatamapi dharmmiṇaṁ bahiṣkarotīti cet etadeva kathaṁ bhavatu bādhakena pravarttamānenaiva tasmin sādhyasādhanāt| sādhyasaṁśayopagame sādhyadharmmiṇi lakṣaṇopagamāditi cet ayuktametat| bādhakamātrāt na sādhyasidvirityasminpakṣe dharmmyantaraparigrahavaiyarthyābhidhānāt| bādhakāt sādhyasidvirityasmiṁstu pakṣe sādhanavaiyarthyamāpāditaṁ| tasmādvādhakamātreṇa sādhyāsidvau na kvacit sandehanivṛttiḥ| sandehānivṛttau na vahiṣkaraṇamavahiṣkṛtaśca sādhyadharmmyeveti tatra vyāptirantarvyāptireva nedānīṁ bahirvyāptervārttāpi| tadiyaṁbahirvyāptiramusmin pakṣe kathaṁ bhavati yadi pratiniyate dharmmiṇi vivādaḥ| tadvahirbhūte ca dharmmiṇi vyāptigrahaṇambhavati| tatra ca durudvaraḥ dharmmyantaraparigrahavaiyarthyadoṣaḥ| bādhakamātreṇa tu sādhyasidvau hetyantarameva vyarthaṁ| api ca satvahetorviśeṣeṇa na vahirvyāptisambhavaḥ|

asidve dharmmiṇaḥ sattve vivādānavatārataḥ|

tatrāsidvasya ca vyāptigrahaṇe sādhyadharmmiṇi||

vyāptigrahaḥ kathaṁ nasyāddṛṣṭānte'pi na vā bhavet||

yatra hi dharmmiṇi dṛṣṭasya hetorvyāptiḥ pratīyate tatra tasya vyāptigrahaṇamākhyāyate| dṛṣṭañca sādhyadharmmiṇi sattvamanyathā vimatyayogāditi kathaṁ nāntarvyāptiḥ|

tathāpi sādhanavaiyarthyaniṣedhāya bahireva gṛhṇīma iti cet tat kimidānīṁ tvadicchānurodhāt dharmmiṇi hetorddarśanamadarśanamastu| darśanaviśeṣe vā bahireva vyāptigrahaṇavyavasthāstu| ubhayatra dṛṣṭasya vyāptigrahaṇe'pyasti bahirvyāptibhāga iti cet| nanu kimarthamiyān bhāgo yatnena saṁrakṣyate|

mābhūt hetuvaiyarthyamiti cet| nanu yadi bādhakavṛttimātreṇa vyāptigrahaṇādhikaraṇe dharmmiṇi sādhyasidveḥ sādhanavaiyarthyamantarvyāptau tadetadvahirvyāptāvapi tulyaṁ| tasmād vyasanamātraṁ bahirvyāptigrahaṇe viśeṣeṇa sattve hetau kevalaṁ jaḍadhiyāmeva niyamena dṛṣṭāntasāpekṣaḥ sādhanaprayogaḥ paritoṣāya jāyate| teṣāmevānugrahārthamācāryyo dṛṣṭāntamupādatte|

yat sattatkṣaṇikaṁ yathā ghaṭa iti| paṭumatayastu naivaṁ dṛṣṭāntamapekṣante|

"tasmāddṛṣṭāntaroktebhyo ghaṭaṁ dṛṣṭāntamabravīt|

tathā māneṣvavaiyarthyādantarvyāptāvapīṣyatām||

ityantaraślokaḥ||

kathamidānīṁ anumeye sattvameva sattvameva sapakṣa eva sattvamasapakṣe vāsattvameva niścitamiti hetostrairupyamavagantavyam|

"matau sapakṣāsapakṣau sādhyadharmmayutāyutau|

sattvāsattve tatra hetoste grāhye yatra tatra vā||"

sādhyadharmmayuktaḥ sarvvaḥ sāmānyena sapakṣaḥ, atadyuktaścāsapakṣa iti| tasmin sapakṣa eva sattvamasapakṣe cāsattvameva yathākramamanvayavyatirekau tau punaryatra tatra vā dharmmiṇi grahītavyau yatra śakyau grahītum|

tadiha sattvasya sarvvato'kṣaṇikādvyāvṛttau bādhakabalāt sidvāyāṁ yat sattat kṣaṇikameveti anvayaḥ sādhyadharmmiṇyavagṛhyate| tatra dṛṣṭasya hetorvyāptigrahaṇāt dharmmyantarāsambhavāt| sambhave'pi tadanusaraṇavaiyarthyāt| yadyevamasādhāraṇo nāma kathamanaikāntika uktaḥ||

asādhāraṇatāṁ hetudoṣammūḍhavyapekṣayā|

abravīdagrahādvyāpti(pte)rnaivaṁ sarvvopasaṁhṛtau||

uktametajjaḍadhiyo dharmmyantara eva vyāptigrahaṇaṁ pratipannāḥ| tadabhimānāpekṣayā'sādhāraṇamanaikāntikamāha śrāvaṇatvaṁ dṛṣṭāntābhāvāt| sādhyadharmmiṇi ca vyāptiraniṣṭeragṛhītāyāṁ vyāptau sandigdhobhayatayā'niścayakaratvāt| athavā asādhāraṇataiva śrāvaṇatvasya mūḍhābhimānopakalpitā| dṛṣṭaiva hi śabdavyaktidharmmiṇī vivādādhikaraṇāt| anyathā dharmmyasidviprasaṅgācca| dṛṣṭādṛṣṭaśabdavyaktisādhāraṇañca śrāvaṇatvaṁ hetuḥ| dhūmasāmānyavat| tataḥ sarvvopasaṁhāravatyāḥ vyāpteḥ sambhavāt sattvādivadadṛṣṭameva sādhanaṁ śrāvaṇatvākhyaṁ| kramayaugapadyānupalambha eva cātra bādhakaṁ pramāṇaṁ | śrotrajñānajana katvameva hi śrāvaṇatvaṁ| tasmānmūḍhavyapekśayā'sādhāraṇatvāt| asādhāraṇasya sarvvopasaṁhārāyogāt| sādhya dharmmiṇi vyāptipratītāveva sādhyapratīteḥ sādhanavaiphalyaṁ syādeva| tanmābhūvvaiphalyamiti naiva vyāptirgrahītavyā| tasyāmagṛhītāyāṁ sandigdhobhayatayā syādanaikāntikatvaṁ| sarvvopasaṁhāreṇa tu vyāptigrahaṇe yathoktanyāyena sādhanavaiphalyābhāvāt| aduṣṭaṁ sattvādi sādhanameveti veditavyam| tadevamubhayathā mūḍhajanāpekṣayā'sādhāraṇamanaikāntikamuktam|

samānañcaitadvahirvyāptivādināmapi yadi hi mūḍhamatāpekṣā na syāt syādeva śrāvaṇatvamaduṣṭo hetuḥ| satvādivanniyataśabdeṣu hi vivāde śabdāntaraṁ syāt|

dṛṣṭāntaḥ sarvvaśabdeṣu vigatau bādhakaṁ pramāṇaṁ pravarttammanaṁ adṛṣṭāntamapi tatraikaṁ dṛṣṭāntayatīti kathama sādhāraṇamanaikāntikaṁ veti|0|

antarvyāptisamarthanaṁ samāptamiti||0||

kṛtiriyaṁ ratnākaraśāntipādānāmiti||0||