santānāntarasiddhiṭīkā

vinītadevakṛtā

santānāntarasiddhiṭīkā

[ mūlasahitā ]

buddhipūrvāṁ kriyāṁ dṛṣṭvā svadehe'nyatra tadgrahāt |

jñāyate yadi dhīścittamātre'pyeṣa nayaḥ samaḥ ||

cittamātramidaṁ sarvamuktavān yo jagadguruḥ |

santānāntarasiddhastaṁ praṇipatya vivicyate ||

buddhipūrvāṁ kriyām ityādiślokenāsya prakaraṇasyābhidheyasambandhaprayojanāni darśitāni | tatra santānāntarasattā'bhidheyam | santānāntarasattāyāḥ siddhiḥ prayojanam | tasya prayojanasyāpi prakaraṇenānena sādhyamānatvāttena sahāsyopāyopeyalakṣaṇasambandhaḥ | kāryakāraṇādisambandhānāmasminnevāntarbhāvānna pṛthagvacanam |

bāhyārthavādinaḥ kila vijñānamātratāyāṁ santānāntarasattā nopapadyata iti codayanti | tathāhi, ta evamāhuḥ - yeṣāṁ cittamātrameva sat, asaṁśca bāhyārthaḥ, na teṣāṁ prāṇyantarapratipattaye pratyakṣapramāṇamasti; jñānamātrasya svāṁśamātrālambanatvāt, vastutastu ālambanābhāvāt |

nāpyanumānam, kāyavākkarmābhāvāt | atha kāyavāgvijñaptibhyāṁ prāṇyantaramanumīyate cet; vijñānamātratāpakṣe kāyavākkarmaṇorvijñaptī na staḥ |

nāpyāgamaḥ sambhavati, tasya rūpaskandhāntarbhāvāt, etasya ca pratikṣepāt | tathāhi, āgamaḥ śabdātmako vā bhaved vyañjanasvabhāvo vā | ubhayamapyetad bhavatpakṣe nāsti | nāpi tadviṣaye rūpiṇa āgamasya prāmāṇyamiṣyate | yato hyayaṁ viṣayaḥ pramāṇadvayaviṣayātīto mataḥ | tathā sati, āgamādapi prāṇyantaraṁ pratipattuṁ na śakyata iti cet ?

tathā vipratipannā bāhyārthāvādina evaṁ vaktavyāḥ | vayamapi pratyakṣataḥ prāṇyantaraṁ naiva pratipadyāmahe | na hi pratyakṣādarvāgdarśinaḥ prāṇyantaramavagacchanti | nāpyāgamo vyañjanasvabhāvaḥ | kintu praṇetṛvaśād yo vākyapadavyañjanaviśeṣapratibhāsijñānotpādaḥ saḥ | sa tu pratipattṛsantāne sannapyupacāratastathāgatasya vā kapilasya vā kaṇādasya vā karturvacanamiti vyapadiśyate | evaṁ sarve'pi bauddhā vācakaṁ śabdasāmānyākāraṁ jñānaṁ manyante; na cāsti śabdaviśeṣaḥ, 'tasya pūrvamadṛṣṭatvād' ityādihetubhiḥ viśeṣākārasya vācakatvabhāvapratiṣedhāt | vayamapi nāgamataḥ prāṇyantarapratipattimabhyupagacchāmaḥ, api tvanumānāt | taccānumānaṁ kāyavākkarmaṇorabhāve'pi yathā pravartate yaddarśayitumāha - buddhipūrvāmityādi | eṣa tāvat samudāyārthaḥ |

avayavārthastūcyate | buddhiḥ jñānam | sā cātra gamanāgamanasaṁlāpecchārūpā parigṛhyate, kriyāhetutvāt tasyāḥ | sā'sti pūrvaṁ yasyāḥ kriyāyāḥ sā buddhipūrvā | pūrveti śabdenātra kāraṇasya nirdeśaḥ, kāraṇasya pūrvavartitvāt | yadi nāma bāhyārthavādibhiḥ svasantāne tāṁ buddhipūrvāṁ kriyāṁ pratyakṣānumānābhyāmupalabhya paścātparasantāne grahād vivakṣitarūpā dhīḥ vijñānaṁ gamyate, tadā cittamātre'pyeṣa nayaḥ samaḥ | atra kriyetyupalakṣaṇam | mukhakāntiraktimādīnāmapi cittāntarasya gamakatvāt | yadīti vacanena vakṣyamāṇabidhinā parapakṣe'numānābhāvaṁ darśayati ||1||

anumānamabhyupagamya tulyatāṁ khyāpayannāha -

ātmani cittaspandanapūrvau kriyābhilāpau dṛṣṭvā'nyatra tayordarśanād yadi spandanamanumīyeta, cittamātre'pyeṣa nayaḥ samaḥ | ataścittamātratāvādī api paracittamanumātuṁ śaknoti |

ātmanītyādi | cittasya spandanaṁ cittaspandanam | atra spandaneti śabdaścikīrṣāyāṁ vartate | kriyābhilāpau tu kāyavāgvijñaptyoḥ | tenāyamartho bhavati - ātmani jigamiṣāvivakṣāpūrvayoḥ kriyābhilāpayordarśanāt parasantāne'pi tau kriyābhilāpau copalabhya cittaspandanamanumīyata iti cet ? cittamātratāvāde'pyeṣa nayaḥ samaḥ | tathā sati, so'pi paracittamanumīyāt | atra spandanetyaviśeṣeṇoktam, tathāpi pūrvaṁ cittaspandanamiti prakṛtenābhisambandhanīyam | tasmāt sāmānyaśabdā api prakaraṇasāmarthyād viśeṣeṣvavatiṣṭhante ||2||

nanu bāhyārthavāde tu paracittanimittake kāyavākkarmaṇī liṅgatvena svīkriyete, antarjñeyavāde tayorabhāvāt kathaṁ sāmyamiti cet ? evamāha -

tacca kāyavāgvijñaptipratibhāsi jñānaṁ jñānāntaraspandanaviśeṣeṇa vinā bhavatītyevaṁ na matam |

taccetyādi | antarjñeyavādināpi kāyavāgvijñāptipratibhāsi kāyavāgvijñaptakārakaṁ jñānaṁ paracittasya spandanaviśeṣeṇa vinā bhavatīti na manyate | svajñānādanyad yajjñānaṁ tat jñānāntaram | tatsamprayuktaṁ spandanaṁ jñānāntaraspandanam, tasya viśeṣastena | viśeṣeti vacanena cikīrṣā, vivakṣā ca parigṛhyete ||3||

bāhyārthavādimatamāśaṅkyate -

atha parajñānasya kriyāyā anupalambhāt paradhīranumātuṁ na yujyata iti cet ? na; tulyatvāt |

atha parajñānasya kriyāyetyādi | na bhavatā kadāpi parajñānapūrvake kriyāvāgākārake jñāne upalabhyete | bhavatā tatkathamanumīyeta iti pūrvapākṣāśaṅkā | antarjñeyavādyāha - na; tulyatvāditi | naiṣa doṣaḥ | yato hi, eṣa upālambho bhavatāmapi tulyaḥ ||4||

tattulyatvaṁ darśayati -

paro'pi parajñānapūrvau tau kadāpi na paśyati | ataḥ tenāpi tanna jñāyate |

paro'pītyādi | bāhyārthavādyapi paracittaspandanapūrvakau tau kriyābhilāpau na kadāpi paśyati | tasmāt tenāpi paracittaṁ na pratipadyate | atyantāsambaddho hyeṣa upālambhaḥ | na hi samarthanāya prasiddhasambandho'nvekṣaṇīyaḥ, api tu doṣasāmyādeva paro nigṛhītaḥ | tasmānna doṣāntaramucyate ||5||

atrāsti paracittānumānopāya iti bāhyārthavādimatamāśaṅkayāha -

ātmanaścittasya paravartinornimittatvānupapatteḥ paracittaṁ jñāyata it cet ? kiṁ na yujyate ?

ātmanaścittasya paravartinorityādi | yasmādātmanaścittaṁ santānāntaravartinoḥ kriyābhilāpayoḥ kāraṇatvena na yujyate, tasmātparacittamanumīyata iti pūrvapakṣāśaṅkā | siddhantabādyāha - kiṁ na yujyata it | kathamātmanaścittaṁ paravartinornimittitvena nopapadyate ? ucyatām ||6||

paro'yuktatvaṁ darśayitumāha -

svasamutthāpakacittasya pratisaṁvedanābhāvāt |

svasamutthāpakacittasya pratisaṁvedanābhāvāditi | parasantānabartinau kriyābhilāpau ātmacittanimittakau vā syātām , paracittanimittakau veti dvidhā parīkṣā | na tāvadātmacittaminittakau, yasmānna svasantāne tayorsamutthāpakacoittasya saṁvedanaṁ bhavati ||7||

hetupasaṁharannāha -

ātmacittaśrayiṇoścātmani darśanāt |

ātmacittaśrayiṇoścetyādi | ahaṁ gacchāmi, ahaṁ vadāmīti ye svacittanimittake kāravākkarmaṇī te svasantāne upalabhyete | ātmanaścittamāśrayata iti vigrahaḥ | atra āśrayīti śabdo nimittake ||8||

bhavatvātmacittanimittakayoḥ svasantāne darśanam | tena kim ? tasmādāha -

tāvapi yadi yathā syātāṁ tādṛśāvupalabhyeyātām |

tāvapītyādi | paravartikriyābhilāpāvapi yadyātmacittaśrayiṇau syātām, tadā tāvapi ātmani dṛśyeyātām ||9||

atha tau kathaṁ dṛśyete ? āha -

anyathā darśanādanyannimittaṁ sidhyatīti cet ?

anyathetyādi | ayaṁ gacchati, ayaṁ vadatītyevaṁ vicchinnadeśe dṛśyete | svacittanimittakatvābhāve sati sāmārthyāccittāntaraṁ sidhyatīti pūrvapakṣāśaṅkā ||10||

siddhāntavādyāha -

aparasminnapi samānameva, svasamutthāpakacittasya saṁvedanābhāvāt |

aparasminnapītyādi | antarjñeyavāde'pi svasantāne vicchinnadeśapratibhāsinoḥ kriyābhilāpapratibhāsijñānayoḥ samutthāpakacittasya pratisaṁvedanaṁ na bhavati ||11||

hetorupasaṁhāro'pi tukya iti darśayannāha -

svacittaspandananimittake vijñāptipratibhāsinī jñāne cāntarmukhapratibhāsinī pratīteḥ bahirmukhapratibhāsinī anyanimittāditpadyete |

svacittaspandananimittake vijñāptipratibhāsinī jñāne cetyādi | ye svacittaspandananimittake kriyāvākpratibhāsinī jñāne te cāntarmukhapratibhāsinī ' ahaṁ gacchami, ahaṁ vadāmi' ityātmasambaddhavijñaptipratibhāsinī pratīyete | parasantānavartinī tu ' ayaṁ gacchami , ayaṁ vadati' iti bahirmukhapratibhāsinī pratīyete | tasmādanyanimittadutpadyeta iti siddham | svacittasya spandanaṁ svacittaspandanam, tannimittaṁ yasyeti vigrahaḥ ||12||

bāhyārthavādī bahirmukhajñānayoḥ spandanakāraṇatve sandihati -

animitte eva bahirmukhapratibhāsinīti kinneṣyete cet ?

animitte eva bahirmukhapratibhāsinītyādi | ye bahirmukhapratibhāsinī jñāne te'nimitte iti kinneṣyete ? na spandananimittale iti vākyaśeṣaḥ | bahirmukhetiśabdo vicchinnālambane | bahirmukhaṁ pratibhāsituṁ śīlaṁ yayoste bahirmukhapratibhāsinī | nāsti nimittamanayoriti animitte | bhavatu kila nimittāmātrasya pratiṣedhaḥ tathāpi prakaraṇavaśāt spandanamātrasya pratiṣedho draṣṭavyaḥ ||13||

siddhāntavādyāha -

animittatve sarvasyānimittatvaṁ prasajyeta |

animittatva ityādi | yadi vicchinnapratibhāsinī kriyāvāgākārake jñāne spandanābhāve'pi vinā kiṁcana kriyāvāgākāraṁ bhavet, tadā sarvāṇyapi kriyāvāgākārakāṇi jñānāni spandanena vinā bhaveyuḥ; viśeṣābhāvādityabhiprāyaḥ ||14||

tatra yadyevaṁ vicintyeta - vicchinnāvicchinnakṛto bhedastvastyeva | tena vicchinnapratibhāsinoḥ animittatvam, itarayostu sanimittatvamiti | ata āha -

vicchinnāvicchinnapratibhāsakṛto bhedo na jñānayoḥ spandanatvanimittabhedavibhāgakṛt |

vicchinnavicchinnapratibhāsetyādi | vicchinnaḥ pratibhāso vicchinnapratibhāsaḥ | tena kṛto bhedo viśeṣalakṣaṇaḥ | sa tu yato na jñānayoḥ spandanatvanimittasya bhedakaḥ; bahirmukhapratibhāsinī spandananimittake na bhavataḥ, itare tu spandananimittake iti | vibhāgastvatra vibhajya sthāpanaṁ nikṣepo vā ||15||

atha nimittatvabhedābhāve ko doṣaḥ syāt ? āha -

tenāvicchinnapratibhāsinorapyanimittatvaṁ bhavet, viśeṣābhāvāt |

tenāvicchinnetyādi | yato hyatra bhinnabhūtayoḥ jñānayoḥ kriyāvākpratibhāsatve na kaścid viśeṣo'sti | tasmād viśeṣābhāvādubhayamapi spandanatvanimittakaṁ na bhavet, atha vobhayamapi spandananimittakam ||16||

tadevaṁ jñānadvayasya sāmyaṁ sādhayitvopasaṁharannāha -

tathā sati, avicchinnatvaviśiṣṭaḥ pratibhāsabheda eva spandanapūrvako na bhavati | kintarhi ? vicchinnasyāpi kriyāviśeṣasya pratibhāsa eva |

tathā sati, avicchinnatvaviśiṣṭaḥ pratibhāsabheda ityādi | yasmādevaṁ jñānadvayasya sāmyam, tasmād yo'vicchinnatvaviśiṣṭaḥ kriyāvākpratibhāsaḥ sa kevalaṁ spandananimittako na bhavati | kintarhi ? vicchinnapratibhāsasyāpi kriyāviśeṣasya pratibhāsamātraṁ spandananimittakam | vicchinno viśeṣo'syāstīti padvigrahaḥ | kriyāviśeṣetyanena kriyābhilāpau darśayati | eveti śabdo mātrārthe draṣṭavyaḥ | tenātrāyaṁ samudāyārthaḥ - vicchinnāvicchinnabhedamanapekṣya sāmānyena kriyābhilāpayoḥ pratibhāsamātraṁ spandananimittakam | yato hi kaścid vicchinno'pi pratibhāsa spandanapūrvako dṛśyate, kaścittavavicchinno'pi nātmaspandanapūrvaka iti ||17||

tasyaiva hetorvyabhicāraṁ vyājena darśayati -

śaropalaprakṣepaṇayantranirmāṇaparapracālanādikriyāviśeṣapratibhāsināṁ vicchinnasyāpi pratibhāsasya spandanapūrvakatvāt |

śaropalaprakṣepaṇetayādi | śarāścopalāśca śaropalam, śaropalau ca | tayoḥ śaropalayoḥ prakṣepaṇamiti vigrahaḥ | śaropalaprakṣepaṇāni yantraṁ ca nirmāṇaṁ ca parapracālanaṁ cetivigrahaḥ | ādiśabdena māyādīnāṁ saṁgrahaḥ | teṣāṁ kriyāviśeṣastu yathāyogaṁ deśāntaragamanādilakṣaṇaḥ | tatra upalayantrayoḥ kriyāviśeṣo deśāntaragamanalakṣaṇaḥ | nirmāṇasya kriyāviśeṣaḥ kṛtyābhidhānalakṣaṇaḥ | parapracālanasya kriyāviśeṣaḥ gatilakṣaṇaḥ | yeṣāṁ jñānānāṁ śaraprakṣepaṇādikriyāviśeṣapratibhāso'sti tāni tathā | bhavatu eteṣāṁ kriyāviśeṣāṇāṁ vicchinnaḥ pratibhāsaḥ, tathāpi spandanapūrvakatvam | etaduktaṁ bhavati - vicchinnapratibhāso'spandanapūrvakatvena na vyāpta iti ||18||

avicchinnapratibhāse'pi vyabhicāraṁ darśayannāha -

parakṛtacālanādīnāṁ cāvicchinnasyāpyatadpūrvakatvāt |

parakṛtacālanādīnāṁ cāvicchinnasyāpītyādi | pareṇa kṛtaṁ cālanamiti samāsaḥ | ādiśabdena bhrāmaṇādīnāṁ saṁgrahaḥ | parakṛtacālanādināmavicchinnapratibhāsānāṁ nātmaspandanapūrvakatvaṁ dṛśyate | etaduktaṁ bhavati - bhavantu ete svadehasambaddhāḥ, tathāpi nātmaspandanapūrvakā iti ||19||

tadevamubhayatrāpi vyabhicārasadbhāvaṁ sādhayitvopasaṁharannāha -

tena hyatra kriyāviśeṣamātreṇa spandanasya pratītiriti yujyate |

tena hyatra kriyāviśeṣamātreṇetyādi | yasmādevamubhayatra vyabhicārasadbhāvaḥ sādhitaḥ , tasmāt kriyāvākyapratibhāsamātreṇa paracittamanumātuṁ śakyate; na tu vicchinnāvicchinnapratibhāsamātreṇa | kriyāviśeṣeti śabdaḥ kāyavāgjñiptipratibhāsaṁ darśayati | mātreti śabdo vicchinnāvicchinnayoḥ bhedaṁ nirākaroti ||20||

tatra yadyevaṁ cintyeta - śaraprakṣepaṇādikriyāviśeṣāṇāṁ pratibhāsāstu vicchinnapratibhāsatve'pi spandanatvapūrvakāḥ; tadanyā vicchinnapratibhāsāstu na tathā syuḥ ? tasmādāha -

tatra yadi kasyacidapūrvakatvam, na ko'pi tatpūrvaka syāt; viśeṣābhāvāt |

tatra yadi kasyacidapūrvakatvamityādi | yadi vicchinnāvicchinnajñānayoranyatarat spandanatvanibandhanaṁ neṣyate, tadā kimapi spandanatvapūrvakaṁ na syāt | kathamiti cet ? āha - viśeṣābhāvāditi | sugamametad ||21||

upasaṁharannāha -

ataḥ kriyāviśeṣasāmānyaṁ spandanaviśeṣasāmānyasya gamakam |

ataḥ kriyāviśeṣasāmānyamityādi | yato hi yadi kasyacidatatpūrvakatvaṁ bhavet sarvasyātatpūrvakatvaṁ prasajyeta | ataḥ kriyāviśeṣamutsṛjya kriyāviśeṣasāmānyena spandanaviśeṣasāmānyamanumīyate | kriyāviśeṣetivacanaṁ kriyābhilāpau darśayati | sāmānyamiti śabdaḥ bahirantarmukhakṛtaṁ bhedaṁ pariharati | na hyevaṁ śakyate'numātum - ṁrāgād vadatīti vā dveṣādvā mohādvā | tasmādeṣo'tra samudāyārthaḥ - kriyābhilāpamātreṇa spandanamātramanumeyam, na tu spandanaviśeṣam; viśeṣe liṅgasya vyabhiucāraditi ||22||

bāhyārthavādena samānatāṁ darśayitumāha -

tatra yathā kriyāmupalabhya, ātmani spandanānupalambhādanyatra spandapratītiḥ; tathā kriyāpratibhāsopalambhane'pi |

tatra yathā kriyāmupalabhyetyādi | bāhyārthavādinā yadi kriyāmupalabhya, ātmani spandanānupalambhāt sāmarthyādanyatra spandanamanumīyata iti cet | antarjñeyavāde'pi tattulyam; kriyāpratibhāsamupalabhya, ātmani spandanānupalambhāt sāmarthyādanyatra spandanamanumīyate || 23 ||

bāhyārthavādinā vicchinnapratibhāsasyānimittakatvaṁ yatpūrva coditam, tadapi samānamiti darśayitum āha -

samānametat; paro'pi parakriyābhilāpayornimittaṁ nāstīti kinnecchati ?

samānametadityādi | bāhyārthavādyapi prāṇyantarasaṁbaddhapratibhāsinau kriyābhilāpau animittakāviti necchati ||24||

bāhyārthavādyanimittau nābhyupagacchati | tadavaśyamabhyupagantavyamiti darśayitumāha -

tenāvaśyaṁ tau spandananimittakatvāttadabhāve na bhavata iti vaktavyam |

tenāvaśyamityādi | tathāvipratipannena bāhyārthavādināvaśyamiyamupapattirvaktavyā - tayoḥ kriyābhilāpayoḥ spandanajanyarūpatvāt spandanābhāve tau na bhavata iti ||25||

athābhyupagatā'pīyamupapattiḥ kiṁ tayeti cet ? āha -

paro'pi tayoḥ pratibhāsau tathaiva vadet | ataḥ nānayoḥ parasparaṁ bhedaḥ |

paro'pi tayoḥ pratibhāsau tathaivetyādi | antarjñeyavādyapi tathaiva vadet - vicchinnapratibhāsijñāne spandanajanyarūpatvāttadabhāve na bhavata iti | tathā sati nānayoḥ bāhyārthavādāntarjñeyavādayoḥ parasparaṁ bhedo'sti | etaduktaṁ bhavati - yathā bāhyārthavādī parasambaddhakriyābhilāpau spandanajanyarūpatvāt tadabhāve na bhavata iti vadati, tathaivāntarjñeyavādyapi bāhirmukhapratibhāsijñāne spandanajanyatvāt tadabhāve na bhavata iti vadet | tathā sati nānayoḥ parasparaṁ kaścidbhedo|'stīti ||26||

bāhyārthavādināmāśaṅkāmudbhāvayitumāha -

yadi tatra pratibhāsinyoḥ spandananimittakatvamucyate, svapnāvasthāyāmapi kinnocyate ?

yadi tatra pratibhāsinyorityādi | kriyābhilāpapratibhāsijñānayoḥ spandananimittakatvaṁ vadan yogācāraḥ svapnāvasthāyāmapi tayoḥ spandananimittakatvaṁ kinna vadatīti pūrvapakṣāśaṅkā ||27||

siddhāntavādyāha -

sarvaṁ samānam | paro'pi svapnopalabdhaparakriyāvācau spandananimittike iti kinna vadati ?

sarvaṁ samānamityādi | na kevalaṁ pūrvaṁ samānam | kiṁ tarhi ? etadapi pūrveṇa saha sarvaṁ samānamiti śeṣaḥ | tāmeva samānatāṁ darśayitumāha - paro'pi svapnopalabdhaparakriyāvācāvityādi | bāhyārthavādyapi svapnāvasthāyāṁ yau parasambaddhau kriyābhilāpāvupalabhyete tau paracittanimittakāviti kinna vadati ||28|

bāhyārthavādīnāmuttaramāśaṅkyāha -

tayorabhāvāditi cet ?

tayorabhāvāditi cediti | svapne tu kriyābhilāpāveva na staḥ | tatkathamabhāvasya spandananimittakatā bhavedityucyet ||29||

antarjñeyavādyāha -

tathopalabdhisāmyāt kinna staḥ ?

tathopalabdhisāmyāt kinna staḥ iti | yathā jāgradavasthāyāṁ kriyābhilāpayorupalabdhiḥ tathā svapnāvasthāyāmapi | tasmāt kriyābhilāpayorupalabdhasāmyāt kasmānna tau staḥ ||30||

bāhyārthavādīnāṁ matamāśaṅkyāha -

atha middhenopahatatvāt puruṣasyārthaśūnyaṁ vijñānaṁ jāyata iti cet |

atha middhenetyādi | puruṣasya middhenopahatatvāt bhrāntirbhavati | tasmādarthaśūnye vijñāne jāyete | tena svapne tayorabhāva iti pūrvapakṣāśaṅkā ||31||

siddhāntavādyāha -

paramate'pi tasmādeva parādhipatyaśūnyaṁ vijñānamupajāyate |

paramata ityādi | antarjñeyavādīnāṁ mate'pitasmāt middhena bhrāntatvādeva parādhipatyarahite kriyābhilāpākāreke jñāne jāyete itīṣṭam ||32||

evaṁ tāvat sautrāntikena saha samānatāṁ pratipādya vaibhāṣikamatāśaṅkyāha -

atha svapne'pi jñānasyārthavattvāttadopalabhyamānānyapi santānāntarāṇyeva iti cet |

atha svapne'pi jñānasyārthavattvādityādi | svapne'pi jñānasyārthavattvāt svapnāvasthāyāṁ yeṣāṁ prāṇināmupalabdhirbhavati te ca sattvāḥ santyeva satyataḥ | tasmāt kathaṁ sāmyamiti pūrvapakṣāśaṅkā ||33||

siddhāntavādyāha -

paraṁ prativigrahītuṁ yadi yuktyāgamarahitastathāvidho'sadvādaḥ samāśriyeta, tadā parābhimataṁ tasya parādhipatyaṁ na ko'pi nivārayet |

paraṁ prativigrahītuṁ yadi yuktvāgamarahita ityādi | yaḥ yuktyā āgamācca rahitaḥ sa yuktyāgamarahitaḥ | yuktyāgamarahito'sau vādo'sādhutvādasadevādaḥ | yadi vaibhāṣikāḥ yogācārān prativigrahītuṁ tamabhyupagaccheyuḥ, anena ca mama parājaya iti | na, ayuktatvāt | tadā yogācārabhimataṁ sattvasya tathāvidhaparadhipatyamapi na kaścinnivārayet | tathāhi, bhavadbhiḥ svapnāvasthāyāṁ ye sattvāḥ abhyupagatāḥ, teṣāmevādhipatyādasmākaṁ vijñaptipratibhāsāḥ jāyanta iti vaktavyaṁ bhavet |

tena hi yad viṣamatvaṁ yuktyāgamarahitatvaṁ tadevaṁ draṣṭavyam | na kutaścidāgamataḥ svapnadṛṣṭarūpasya sadbhāvaḥ prajñāyate | yuktyāpi nopapadyate | tathā sati svapnadṛṣṭarūpasya sapratighatvaṁ sanidarśanatvañca bhavet | tena hi hastyādīnāṁ gavākṣādiṣu praveśo nopapadyeta, taddeśasthairapi dṛśyo bhavet | atha sanidarśanaṁ sapratighaṁ ca neṣyate, tadā rūpameva tanna bhavet | nāpyavijñaptiniyamaḥ, tadanabhyupagamāt | yadātmānaṁ bahirgataṁ prekṣate,tadā santānasya dvitvamapi prasajyeta | prāṇyantaradarśane'pūrvasattvotpattitpattirapi prasajyeta | svapnakṛtābrahmācaryāt pārājikatvamapi prasajyeta | svapnadṛṣṭarūpasya sadbhāvābhyupagame tvevemādayo bahavo doṣā prasajyante ||34||

evaṁ tāvat samānatāṁ prasādhya svapakṣe yuktyāgamarahitatvaṁ parihartumāha -

etat keṣāñcinmata eva sarvāṇi tathāvidhāni ġyānāni santānāntarāyattāni | viśeṣastu sākṣātparamparayā ca |

etat keṣāñcinmata ityādi | etadityāveśenoktam | keṣāzncid yogācārāṇāṁ mata eva jāgradavasthāvat svapne'pi tathāvidhānī kriyāvāgākārajñānāni parasantānā yattāni bhavanti | viśeṣastu etāvanmātram - jāgradavasthāyāṁ sākṣādāyattāni, svapnāvasthāyāṁ tu prāyeṇa paramparayā ||35||

svapne'pi sākṣādvṛtteḥ sambhāvanāṁ pratipādayitumāha -

kadācit svapne'pi tasya sākṣātsantānāntarāyattatā iṣṭaiva |

kadācit svapne'pītyādi | sugamametat ||36||

sākṣādvṛttitvaṁ darśannāha -

devādyadhiṣṭhānataḥ satyasvapnadarśanāt |

devādyadhiṣṭhānata ityādi | devādyadhiṣṭhānataḥ supriyavaṇijo vijñaptipratibhāsīni jñānāni jāyante ādītyanena yogipiśācādīnāmadhiṣṭhānāni saṁgṛhītāni ||37||

svapakṣamupasaṁharannāha -

tasmādasya naitadasadvādasamāśrayaḥ |

tasmādasyetyādi | tasmādasyaivaṁvādino yogācārasya nāsadvādasamāśrayaḥ ||38||

punaścāparasmin samānatāṁ sādhayituṁ sautrāntikaṁ pṛcchati -

tāvattayā kriyayā'pi taccittaṁ kathaṁ jñāyate ?

tāvattayā kriyayetyādi | vijñaptipratibhāsasya gamakatvamityabhimataṁ tāvadavasthāpyam | muhurbhavataiva paryanuyujyate - kasmāt bhavatparikalpitayā tayā kriyayā paracittaṁ jñāyate ||39||

tathā paryanuyoge sautrāntika āha -

cittasya kāryatvāt |

cittasya kāryatvāditi | yasmāccittasya kāryam , tasmāt sā gamikā ||40||

siddhāntavādyāha -

tasya kāryatvaṁ tu cittantare'pi tulyamiti kathanna jñāyate ?

tasya kāryatvamityādi kriyā cittasya kāryatvāccittasya gamiketi cet ? cittasya tatkāryatvaṁ tu kriyāpratibhāsijñāne'pi tulyatvāttena kriyāpratibhāsenāpi kasmāt paracittaṁ na jñāyate ||41||

siddhāntavādī hetūpasaṁhāravyājena parapratibhāsijñānameva liṅgatvenābhyupagamayitumāha -

api ca, yadi tatkriyā svasattāmātreṇa svasantānaṁ pratyāyet, tadānupalabhya mānenāpi syāttathā pratipattiḥ |

api ca, yadi tatkriyetyādi | kiñceyaṁ kriyā sattāmātrāt paracittamavabodhayed ohosvit jñānāt ? yadi tāvad sattāmātrāditi, tadā kriyāmanupalabhyamānenāpi prāṇinā paracitta pratipadyeta ||42||

paramatamāśaṅkyāha -

na; jñānāpekṣatvālliṅgasyeti cet |

na; jñānāpekṣatvādityādi | na hi liṅgaṁ sattāmātrāt gamakaṁ bhavati | kiṁ tarhi ? jñānāt | tasmānnāyaṁ doṣaḥ ||43||

siddhāntavādyāha -

tadā tatra kimanayā paramparayā - paracittāt kriyā, kriyātaḥ jñānam, jñānāttasya pratipattiriti |

tadā tatretyādi syānmatam - liṅga jñānamapekṣya gamakamiti | hanta, tarhi na kiñcit prayojanamanayā paramparayā | tāṁ paramparāṁ darśayannāha - paracittāt kriyetyādi | paramparā tu paracittāt kriyā utpadyate , kriyātaḥ jñānam, jñānāttasya pratipattiriti ||44||

kaśya punarnyāya iti cedāha -

paracittaprabhavadharmi kriyāpratibhāsijñānamevāsya gamakaṁ bhavati |

paracittaprabhavadharmītyādi | paracittaprabhavadharmi kriyāpratibhāsijñānameva gamakamiti manvīta | paracittaprabhavadharmo'syāstīti vigrahaḥ ||45||

kriyetyapi yujyeta, kriyāpratibhāsijñānamityapi yujyeta | kaścātra viśeṣaḥ ? tasmād āha -

tasyādhigatistvantaśastadāśritatvāt |

tasyādhigatistvantaśa ityādi | yato hyabhyupagatāyāmapi kriyāyāṁ paracittasyādhigatistu kriyāpratibhāsijñānādhīnaiva | tasmāttadevāstu | kimanayā parikalpitayā kriyayā ||46||

evaṁ paraṁ nigṛhya svamatamākhyātumāha -

spandanamātrasāmānyāṁ kriyābhilāpajñānasāmānyasya kāraṇatvāt kāryeṇa lāraṇasya gatiḥ |

spandanamātrasāmānyaṁ kriyābhilāpajñānasāmānyasyetyādi | kriyābhilāpajñānasya sāmānyaṁ kriyābhilāpajñānasāmānyam | tasya kāraṇaṁ tvaviśeṣeṇa spandanamātramiṣṭam | tathā sati kriyāpratibhāsijñānasāmānyaṁ spandanamātrasāmānyasya gamakamiṣyate | ata eva uktam - kāryeṇa karaṇasya gati iti | jñānasāmānyetyatra sāmānyeti śabdena vicchinnāvicchinnapratibhāsakṛtaviśeṣaḥ nirākṛtaḥ | spandanamātretyatra mātreti śabdena rāgādikṛtaviśiṣṭaspandanaṁ nirākriyate ||47||

evaṁ sāmānyena kāryakāraṇabhāvaṁ nirdiśya kāryasya bhedamupadarśayitumāha -

tatra ātmaspandananimittakasyāntarmukhavṛttiḥ, anyasyānyathā | prāyeṇādhikṛtya asau bhedaḥ |

tatra ātmaspandananimittakasyetyādi | ātmaspandanātsamutthitaṁ yajjñānaṁ tasyāntarmukhapratibhāsatayā vṛttiḥ, paraspandanātsamutthitasya tu bahirmukhapratibhāsatayā | mukheti śabdo'trālambane vartate | prāyeṇādhikṛtyetyanena śaraprakṣepaṇādīnāaṁ parakṛtacālanādīnāṁ ca pradarśanam |48||

tatra syānmatam - bhavatu jāgradavasthāyāṁ kāryakāraṇabhāvaḥ, svapnāvasthāyāṁ tu tatkathamiti cet ? āha -

etayoḥ saḥ kāryakāraṇabhāvaḥ svāpādyavasthāyāmitarasyāmapi ca samānaḥ |

etayoḥ saḥ kāryakāraṇabhāva ityādi | yaścānantaroktaḥ kāryakāraṇabhāvaḥ, saḥ svāpajāgradavasthayośca samānaḥ | ādītyanena kāmaśokādibhirupahatāvasthānāṁ parigrahaḥ ||49||

nanu svapne samutthāpakaspandanameva nāsti | tatkathaṁ kāryakāraṇabhāvasya samānateti | tasmādāha -

bhrāntyavasthāyāṁ yathāsvaṁ pratyayaviśeṣopāśrayāt paraspandanādinimittodbhūtavijñānavāsanaiva kadācitparābhogādeḥ vyavahitādapi vṛttiṁ labhate, na tu atyantāsadābhogāt |

bhrāntyavasthāyāmityādi | bhrāntyavasthāyāmiti middhenopahatādyavasthāyām | yathāsvamityanena svapnasya middhaviśeṣaḥ, narakādeḥ karmavipākāvasthā ca parogṛhyate | pratyayaviśeṣo middhādiḥ | upāśrayaṇam upāśrayaḥ | pratyayaviśeṣasya upāśrayaḥ pratyayaviśeṣopāśrayaḥ | pratyayaviśeṣamupāśrayata iti yāvat | paracittena saṁprayuktaṁ spandanaṁ paraspandanam | ādītyanena mukhakāntiraktimādīnāṁ janakacittasya paroigrahaḥ paraspandanādi ca nimittaṁ ceti samāsaḥ | nimittatvamatrādhipatipratyayatvamiti draṣṭavyam | yasya kriyādipratibhāsivijñānasya tadanyasmāt spandanādinimittādudbhavituṁ śīlamasti tat paraspandādinimittodbhūtavijñānam | tasya vāsanā śaktiḥ | parābhogaḥ paramanaskāraḥ ādītyanena tatkālabhāvināṁ tadanyapratyayānāṁ parigrahaḥ | vyavahitaḥ kālaviprakṛṣṭaḥ | apīti śabdo'vyavahite devādyadhiṣṭhānāt svapnadarśane'pi | tasyāḥ vṛttilābhaḥ kriyāpratibhāsivijñānajananayogyātmatayā samavadhānam | evamuktaṁ bhavati - bhrāntyavasthāyāṁ pratyayaviśeṣasya upāśrayāt paraspandanādinimittadudbhūtavijñānavāsanā kadācit vyavahitād parābhogādapi vṛttiṁ labhate | yasyāstu parābhogo'tyantāsanna tasmād vṛttiṁ labhate ||50||

evaṁ svapnāvasthāyāmapi kriyāpratibhāsijñānānāṁ spandananimittakatvaṁ sādhayitvā upasaṁhartum āha -

tasmāt sarvāvasthāsu kriyādivijñapteḥ cittaspandanamanumīyata eva |

tasmāt sarvāvasthāsvityādi yasmādevamavyabhicāritvaṁ sādhitam, tasmāt svāpajāgradubhayorapyavasthayoḥ kriyāpratibhāsāt cittaspandanamanumīyata eveti sthitam | ādi ityanena abhilāparaktimādivijñaptīnāṁ parigrahaḥ ||51||

evaṁ svamataṁ nirdoṣīkṛtya paramate doṣamudbhāvayitumāha -

kriyātaḥ spandanapratipattau svāpa itarasmiñca syāt pratipattiratha vā naiva kadācana |

kriyātaḥ spandanapratipattāvityādi | yamnate kriyātaḥ spandanasya pratipattiḥ, tanmate svpnādāvapi kriyātaḥ spandanasya pratipattirbhavet | atha svapne kriyātaḥ spandanasya pratipattirneṣyeta, tadā tat jāgradavasthāyāmapi yujyeta na kadāciyt kriyātaḥ spandanasya pratipattirbhavediti vākyaśeṣaḥ ||52||

kathamiti cet ? tasmādāha -

paraspandanābhāve'pi kriyālambanodayāt |

paraspandanābhāve'pītyādi | tathāhi, svapne paracittaspandanābhāve'pi kriyālambanam udeti | yasyābhāve'pi yadutpadyate, na tattasya gamakaṁ yuktaṁ ||53||

pratividhātukāmo bāhyārthavādyāha -

bhavatvālambanodayaḥ, na tu kriyā | kriyayā spandanaṁ gamyete | bhrāntyavasthāyāṁ kriyaiva na bhavati | arthaśūnyajñānodayānna doṣaḥ |

bhavatvālambanodayarityādi | ālambanaṁ tu spandanābhāve'pyutpadyate, na tu kriyā | asmākaṁ mate kriyā spandanasya gamakam | sā ca bhrāntyavasthāyāṁ na bhavati | kathaṁ na bhavati ? āha - arthaśūnyajñānodayāditi | yasmāt bhrāntyavasthāyāmarthaśūnyāni jñānāni utpadhyante, tasmānnaiṣa doṣa iti pūrvapakṣāśaṅkā ||54||

siddhantavādyāha -

sarvaprakāravyapadeśasāmyāt kadācijjñānamarthaśūnyam, anyadānyathetyeṣo'dhikāraḥ kuto labdhaḥ ?

sarvaprakāravyapadeśasāmyādityādi | yasya vyapadeśasya santi sarve prakārāḥ sa sarvaprakāravyapadeśaḥ | sarvaprakāravyapadeśasāmye svapnāvasthāyāṁ jñānamarthaśūnyamutpadyate, jāgradavasthāyāṁ tu sārthamityetat jñānam, adhikāro vā bhavatā kuto labdhaḥ ? evamuktaṁ bhavati - jāgradavasthāvat svapnāvasthāyāmapi dṛśyākārādayaḥ sarve santi | tatkathaṁ tatra jñānamarthaśūnyamiti ||55||

paramatamāśaṅkitumāha -

atha middhādinā'vasthā'nyathābhāvaścet |

atha middhādinetyādi | yathāsyāmavasthāyāṁ middhadinā'rthaśūnyajñānānāmutpattirbhavati, tathā anyathābhāva it pūrvapakṣāśaṅkā ||56||

siddhāntavādyāha -

yadyevaṁ sambhavet, bhavatu avidyoipaplutatvāttathodayaḥ |

yadyevaṁ sambhavedityādi | yadi bhrāntivaśādavasthā'nyathābhāvādarthaśūnyaṁ jñānaṁ jāyata iti abhyupāgamyeta, tadā mahābhramarājñyā avidyāyāḥ sadbhāvāt tadvaśācca sarvāṇi jñānānyarthaśūnyāni jāyanta iti manyeran ||57||

tathā sati ko guṇaḥ ? āha -

tathā satyarthāntaravādahānyā ete'nekāśakyanigūhanāvatārāḥ mahākṛcchrā uttareṇaikena nihatā bhavanti |

tathā satyarthāntaravādetyādi | arthāntaraṁ vadatīti arthāntaravādaḥ | arthāntaravādasyaiva hānyā arthāntaravādahānyā | asya kṣemadharmebhyaścyutatvādayukto bhavati | yasmārthāntaravādasya aneke avatārāḥ doṣāḥ parihāralakṣaṇenāśakyanigūhanāḥ santyamī anekāśakyanigūhanāvatārāḥ | mahāntaḥ kṛcchrāḥ santyasyeti mahākṛcchrāḥ | uttereṇaikeneti ekasmāduttarāt | nihatāḥ nirākṛtāḥ | aśakyanigūhanāvatāratvaṁ tu kṛte ekasya parihāre'nyānyadoṣodbhavāt | evamuktaṁ bhavati - yadā'vidyopaplutatvāt sarveṣāṁ jñānānāmarthaśūnyatvamabhyupagamyate, tadā'rthāntaravādasya ye'nekāśakyanigūhanāvatārāsta uttareṇaikena nirākṛtā bhavanti ||58||

evaṁ santānāntarasiddhiṁ parisamāpyāvaśiṣṭān durupālambhān parihartukāmaḥ paramatamāśaṅkitum āha -

nanu tayoḥ darśanāt kāyavāgvijñaptibhyāṁ svamutthāpakacittasyānumānamiti nyāyyam | na tu santānāntarasambaddhavijñāptipratibhāsijñāne paravijñaptī bhavitumarhataḥ, tayoranupādānopādeyatvāditi cet |

nanu tayoḥ darśanātkāyavāgvijñaptibhyāmityādi | nanvityanenākṣamyatāṁ darśayati | nanu kāyavāgvijñaptipratibhāsābhyāṁ tayoḥ samutthāpakacittasyānumānamiti nyāyyam | tatra syānmatam - etadapi samānamiti | ata āha - santānāntarasambaddhetyādi | ye ca śrotṛsantānasambaddhavijñaptipratibhāsijñāne spandanasya gamake iti bhavadbhiriṣṭe, kathaṁ te vaktuḥ vijñaptī syātām ? atra santāneti śrotuḥ santānaḥ | tamapekṣya antareti śabdena vaktuḥ parigrahaḥ | kasmānnārhataḥ ? ityāha - tayoḥ anupādānopādeyatvāditi | ayamabhiprāyaḥ - śrotṛsantānapratibaddhavijñaptipratibhāsasya na vaktuḥ vivakṣayā sahopādānopādeyabhāvaḥ, bhinnasantānaparyāppannatvāditi pūrvapakṣaḥ ||59||

tatra siddhāntavādyāha -

nocyate paracittasamitthitavijñaptirūpatvāt tatra pratibhāsijñānena samutthāpakacittaṁ gamyata iti | kiṁ tarhi ? tasya kāryatvāt |

nocyata ityādi | paracittena samutthitā paracittasamitthitā | paracittasamitthitā ca vijñaptiśceti paracittasamutthitavijñaptiḥ | sā yasya pratibhāsino jñānasya rūpaṁ svabhāvo'sti tattathā | tasya bhāvaḥ tattvam | tasmāt paracittasamutthitavijñaptirūpatvāt | tatra vijñapteḥ pratibhāso'syāstīti pratibhāsi | evamuktaṁ bhavati - yasmāt tatra pratibhāsi jñānaṁ paracittasamutthitavijñaptirūpam, tasmāt samutthāpakacittaṁ gamyata iti vayamapi nābhyupagacchāmaḥ | yadi nābhyupagamyate, kiṁ tarhi abhyupagamyata iti cet ? āha - kiṁ tarhi ? tasya kāryatvād iti | yasmād vijñaptipratibhāsijñānaṁ paracittasya kāryam, tasmāt paracittaṁ gamyate | atra paracittaṁ vaktuścittamabhipretam ||60||

yadi śrotṛsantānājjāte kriyāvāgākārake jñāne vijñaptitvena neṣyete, kā punaranyā vijñaptiścet | tasmādāha -

vijñaptiriti samutthāpakacittasantānājjāte kriyāvāgākārake jñāne eva |

vijñaptirityādi | samutthāpakacittasantānājjāte ye kriyāvāgākārake jñāne te vijñaptitvena vyapadiśyete | evamuktaṁ bhavati - vaktureva ye gamanābhilāpane kriyāvāgākārake jñāne te vijñaptīti ucyete ||61||

samutthāpakacittaṁ svaparasantānagatayoḥ kriyāvāgākārakajñāneyoryathā kāraṇabhāvo bhavati taddarśayitumāha -

samutthāpakacittaṁ ca tayorevopādānakāraṇam, santānāntarajñānayostu adhipatipratyayaḥ |

samutthāpakacittam ca tayorityādi | upādānākāraṇamasādhāraṇakāraṇe vartate | samutthāpakacittaṁ svasantānagatayoḥ kriyāvāgākārakayorevopādānakāraṇam, parasantānasambaddhayostvadhipatipratyayaḥ | taccopādānakāraṇaṁ paratamapekṣya upanyastam | svamate tu upādānakāraṇamālayavijñānamiṣyate, na tu vivakṣācittam ||62||

evaṁ tāvat svasantānāgatayoḥ kriyāvāgākārakayorvijñaptivaṁ pratipāditam | santānāntarasaṁbaddhayośca sādhayitumāha -

vijñapterūpādānātte janite | tatsambandhenopacārād vijñaptī bhavataḥ |

vijñapterūpādānātte janite ityādi | vijñapteryadupādānakāraṇaṁ tena te santānāntarasambaddhakriyāvāgākārake jñāne janite | tajjanisambandhena tena hetunā upacārād vijñaptīti vyapadiśyete ||63||

syānmatam - svasamutthāpakacittasya vijñāpanād vijñaptiḥ | na hi śrotā vaktṛsantānājjāte kriyāvākpratibhāsijñāne upalabhate | tathā hi, vaktā śrotā cobhāvapi svasvapratibhāsamanu bhavataḥ | tatkathaṁ te'nālambane vijñaptitvena svasamutthāpakasya gamake iti | tasmādāha -

bhavatu svaparayoḥ svasvapratibhāsasyānubhavaḥ, taimirikadvayadṛṣṭadvicandravat | tathāvidhavijñānasya hetuḥ vāsanotpādasvabhāvaviśeṣo'nādikālikaikārthagrāhādhyavasāyitvāt, ekahetusambhūtayoḥ svaparavijñaptijñānayoḥ vijñaptitvena upacāraḥ |

bhavatu svaparayorityādi | svapareti vaktā śrotā ca | svasya svasya pratibhāsasya anubhavaḥ svasvapratibhāsasyānubhavaḥ | taimirikadvayena pratibhāsasyānubhavaḥ taimirikadvayadṛṣṭadvicandram | tena tulyatvāt tadvat | tathāvidhavijñānamiti ekārthagrāhādhyavasāyi vijñānaṁ matam | tasya hetuḥ ekārthagrāhādhyavasāyasyānubhavitṛ pūrvavijñānam | tajjanitā vāsanā śaktirūpā | tasyā utpāda utpādavyayalakṣaṇaparamparāyā udayaḥ | svarūpa utpādasvabhāvaḥ | tasya viśeṣa ekārthagrāhādhyavasāyivijñānopajanane samarthātmani sthitiḥ |

anādiścāsau kālaśceti anādikālaḥ | tasmādāgato'nādikālikaḥ | atha vā'nādikāle bhavo'nādikālikaḥ | na ādikālikaḥ anādikālikaḥ | ekaścāsau arthaśceti ekārthaḥ | gamanavāgādisvaparavijñaptyoḥ buddhyā ekīkaraṇam | ekārthagrāheti ekārthagrāhijñānam | ekārthagrāhādhyavasāyi iti adhyavasāyijñānam | tathā hi, vaktā caivaṁ cintayati - yanmayā kathitaṁ tat śrotrā jñātam | śrotā'pyevaṁ cintayati - yadanena kathitaṁ tanmayā pratītam | ityevaṁ ekārthagrāhādhyavasāyaḥ |

ekahetunā samutthāpakena ye sambhūte te ekahetusambhūte | svaparavijñaptijñānayoḥ vaktṛśrotṛkriyāvāgākārakajñānayoḥ vijñaptitvenopacāraḥ vijñaptitvena vyapadeśaḥ | evaṁ vaktā śrotā ca svasvapratibhāsamanubhavataḥ | tathāpi tayoḥ ya ekahetusambhūte kriyāvāgākārakajñāne ta ekārthapratītiniyamād vijñaptitvena vyapadiśyete |

ekārthagrāhādhyavasāyastu tathāvidhavijñānasya heturvāsanotpādasvabhāvaviśeṣo'nādikālikatvād | taimirikadvayadṛṣṭadvicandravaditi dṛṣṭāntaḥ | ekaḥ taimirikaḥ dvitīyaṁ taimirikaṁ 'paśya' iti "aparaṁ candraṁ' darśayati | tena ca 'dṛśyate" ityucyate | tatra 'mayā asmaidarśitaḥ' ityevaṁ darśakasyābhimāno bhavati | śrotā'pi 'anena mahyaṁ darśitaḥ iti cintayati | tathāpi tau svasvapratibhāsaṁ prativittaḥ | tadvadatrāpi ekārthapratītiniyamāt svaparavijñaptijñānayorvijñaptitvenopacāro bhavati ||64||

tṛṇāvalambina iva bāhyārthabādinaḥ prāhuḥ -

kiñca kriyādipratibhāsivijñānāt kāryaliṅgājjātaṁ yatparacittajñānaṁ

tatparacittaṁ viṣayīkriyata āhosvinna ? viṣayīkaraṇe'rthāntaraṁ syāt |

aviṣayatve tu kathaṁ jñānena paracittasattā pratīyate ? tatsvarūpājñāne

tatsiddherasambhavāditi cet ?

kiñca kriyādipratibhāsītyādi | kriyādipratibhāso'sti yasya vijñānasya tat kriyādipratibhāsivijñānam | tadeva kāryaliṅgam | tasmājjātaṁ kriyādipratibhāsivijñānāt kāryaliṅgājjātaṁ yat paracittasya svarūpaṁ viṣayīkaroti āhosvinneti dvidhā parīkṣā | prathamavikalpe doṣaṁ darśayotumāha - viṣayīkaraṇa ityādi | yadi nāma viṣayīkaroti, tadā tasya viṣayaḥ pṛthak syāt | dvitīyavikalpamupadarśayannāha - aviṣayatve tvityādi | atha na viṣayīkaroti, tadā kathaṁ paracittasattā jñāyate ? kathaṁ na jñāyate ? āha - tatsvarūpājñāna ityādi | tatsvarūpajñānādhīno hi bhāvopacāraḥ | sa tu tadabhāve na bhavatīti pūrvapakṣaḥ ||65||

siddhāntavādinaḥ -

eṣa prasaṅgo'pi samaḥ |

eṣa prasaṅgo'pi sama iti ||66||

samatāṁ darśayitumāha -

kriyāvāgbhyāṁ paracittapratipattimatāmapi tatsvarūpaviṣayīkaraṇe svacittajñānavattadākārasyāpi jñānaṁ prasajyeta | tadajñāne tu tena tatsvarūpasya grahaṇaṁ katham |

kriyāvāgbhyāmityādi | kiñca yadā bāhyārthāvādibhiḥ kriyāvāgbhyāṁ liṅgābhyāṁ paracittaṁ jñāyate, tadā tasya paracittasya svarūpaṁ viṣayīkriyata āhosvinna ? yadi nāma viṣayīkriyate , tadā paracittasyākāro'pi jñāyeta | atha na viṣayīkriyate, tadā tena jñānena pratipattrā vā kathaṁ jñāyeta ? ||67||

bāhyārthāvādināṁ matamāśaṅkitumāha -

atha liṅgāt sāmānyādhigateḥ nākārasya pratītiriti cet ?

atha liṅgāt sāmānyādhigate ityādi | yasmālliṅgaṁ sāmānyena vyāptam, na tu viśeṣeṇa | tasmātsāmānyameva jñāyate, na viśeṣa iti pūrvapakṣāśaṅkā ||68||

siddhāntavādyāha -

kiñca tatsāmānyaṁ paracittamevānyadvā''hosvidavācyam |

kiñca tatsāmānyamityādi | kiñca tatsāmānyaṁ paracittameva vā, anyadvā, āhosvidavācyamiti tridhā parīkṣā ||69||

vikalpadvayaṁ nirākartumāha -

anyatvāvācyatvayorekatve tvanena tatsāmānyameva gṛhyeta, na paracittam |

tatkathamanena tad gamyate |

anyatvāvācyayorekatva ityādi | anyatvapakṣe sāmānyameva gṛhyeta, na paracittam | tasmāt kathamanena jñānena tat paracittaṁ jñāyate ? avācyatvapakṣe'pi eṣa eva nayaḥ ||70||

abhedapakṣaṁ nirākartumāha -

nāpi sāmānyaṁ paracittameva | tathā sati tadākārastāpi jñānaṁ prasajyeta ityuktam |

nāpi sāmānyaṁ paracittamevetyādi | nāpi sāmānyaṁ paracittasya svarūpam | kasmāt ? āha - athā satītyādi | yadi paracittādananyasya sāmānyasya grahaṇamabhyupagamyate, tadā paracittākārasyāpi jñānaṁ prasajyeta ityuktaṁ prāk ||71||

syādetat - tathā'stu, ko doṣaḥ ? ucyate -

na hyeṣā anumānaprakriyā |

na hyeṣā anumānaprakriyeti ||72||

tadeva vivṛṇoti -

na hyanumānamarthasvarūpasya grāhakam | pratyakṣavat pratibhāsāsaviśiṣṭatvādeḥ prasaṅgāt |

na hyanumānamarthasvarūpasyetyādi | na hyanumānaṁ svalakṣaṇasya grāhakatveneṣyate | pratyakṣeti tu vaidharmyadṛṣṭāntaḥ | kathanna svalakṣaṇasya grāhakatveneṣyate cet ? āha - pratibhāsāviśiṣṭatvādeḥ prasaṅgāditi | anumānasyāpi pratyakṣavat sfuṭābhatā syāt | ādirityanena pratyakṣodbhūtadharmiṇo atītādiviṣayasya cāgrāhakatvamapi prasajyeta ||73||

syādetat - pratibhāsāviśiṣṭatvābhyupagamyata eveti | āha -

tena nāsya prāmāṇyam |

tena nāsya prāmāṇyamiti | pratibhāsāviśiṣṭatvādāvabhyupagate sati anumānenārthasvarūpasya grahaṇam | tena bhavatu prāmāṇyamiti cet ? naiṣa nyāyaḥ ||74||

yadi pramāṇasya svalakṣaṇagrahaṇanibandhanatvaṁ neṣyate, tatkathamasya pramāṇyamiti cedāha -

tatsvarūpāgrahe'pyabhipretārthāvisaṁvādāt prāmāṇyam |

tatsvarūpāgrahe'pītyādi | na hyanumānena viṣayasvarūpasya grahaṇam, apitu abhipretārthāvisaṁvādakatvāt prāmāṇyamiṣyate | kvacit granthe'tena nāsya prāmāṇyam' iti pāṭhaḥ | tatra tvevaṁ yojanīyam - yadā pratibhāsādayo'bhinnāḥ, tadā pramāṇameva na taditi | yadi anumānena svalakṣaṇaṁ gṛhyeta, tarhi pramāṇameva neṣyate | katham ? āha - tatsvarūpāgrahe'pītyādi | svarūpasyāgrahe'pyabhipretārthāvisaṁvāditvādasya prāmāṇyam, na tu svalakṣaṇagrahaṇāditi ||75||

syādevam - svalakṣaṇasyāgrahaṇe'pyaparāparānumānena paracittamanumīyate | kathaṁ tadgrahaṇaṁ nivāryate ? ata āha -

dhūmādiliṅgājjātamapi na vahnyādisvarūpaviṣayi , dṛṣṭenāviśeṣaprasaṅgāt,

anumānasyātītādau niḥsvabhāvatāyāṁ cāpravṛtteḥ, arthakriyāprasaṅgācca |

dhūmādiliṅgājjātamapītyādi | na hi dhūmādiliṅgājjātamanumānaṁ vahnyādeḥ svarūpasya grāhakatveneṣyate | katham ? āha - dṛṣṭenāviśeṣaprasaṅġāditi | yadyanumānaṁ svalakṣaṇaviṣayaṁ gṛhṇīyāt , tadā pratyakṣeṇa tulyatvaṁ prasajyeta | nāpyanumānamatītānāgataviṣayi, vastunaḥ niḥsvabhāvatāviṣayi ca syāt | pratyakṣapratibhāsasyevānumānavikalpapratibhāsasyāpyarthakriyākāritvaṁ syāt ||76||

syādetat - paracittānumāne tasyāvisaṁvāditvameva nāsti | ata āha -

paracittānumāne'pyabhipretārthāvisaṁvādo'styeva |

paracittānumāne'pītyādi ||77||

avisaṁvāditvasyopapattiṁ darśayannāha -

tatpravartanadvāreṇa prāṇyantarasattāṁ pratipadya punaḥ punarvyavahārapravṛttau tadādhipatyādāgatārthasya prāpteḥ |

tatpravartanadvāreṇa prāṇyantaramityādi | pravṛttivyāpārāt paracittasyānumānam | taddvāreṇa prāṇyantarasattāṁ pratipadya yadi punaḥ punarvyavahārapravṛttimabhilāṣavyāyāmānyatrānyatragamanādikāṁ kuryāt, tadā prāṇyantararādhipatyenāgato'rthassaṁlāpādiḥ prāpyate | atha vā punaḥ punarvyavahārapravṛttimabhilāṣavyāyāmadeśāntaragamanādikāṁ kuryāt, tadā prāṇyantarādhipatyena agato'rthaḥ saṁlāpāt | atha vā punaḥ punarvyahāre pravartanamiti saṁlāpādanu gṛhapraveśaḥ, tadanu āsanadānam, tadanu cānnapānadānam, tadanu ca śayyāsanaprajñapanam, pādaprakṣālanodakadānam, pādamardanamityādīni ||78||

kiṁ punaruttaravyahārasādhanāya prāmāṇyamiṣyata iti cet ? ata āha -

tanmātrafalacintakasya lokasya prāṇyantarānumāne pravṛtteśca |

tanmātrafalacintakasyetyādi | tanmātraṁ falamiti tanmātrafalam | taditi śabdo'rthakriyāyāṁ vartate | mātreti śabdaḥ māne | yo lokaḥ tanmātrafalaṁ cintayati saḥ tanmātrafalacintakaḥ pravṛttaḥ | evamuktaṁ bhavati - yo laukikaprāṇyantarasattāmanuminoti , saḥ prāṇyantaradhipatyādāgatām arthakriyāṁ prāpnoti | ceti śabdena tanmātraṁ lokasya pravṛttifalamityartho'vasīyate ||79||

kathametat ? āha -

uttarārthaviśeṣapratibhāsijñānānubhavodayamātreṇa puruṣasya nirākāṅkṣatvāt |

uttarārthaviśeṣapratibhāsītyādi | uttārārthaviśeṣo dāhapākādiḥ | tathā pratibhāsituṁ śīlaṁ yasya jñānasya tattathā | tasyānubhavaḥ uttarārthaviśeṣapratibhāsijñānānubhavaḥ | tasyodaya eva udayamātram | nirākāṅkṣa ityākāṅkṣārahitaḥ | tasya bhāvaḥ tattvam | tasmāt nirākāṅkṣatvāt | evamuktaṁ bhavati - yadā puruṣasya vahnyupalabdheranu dāhādipratibhāsijñānānubhavodayaḥ, tadaivāyaṁ nirākāṅkṣo bhavati ||80||

bhavatu tanmātreṇaiva puruṣaḥ nirākāṅkṣaḥ, kintu kathaṁ tanmātreṇa pūrvajñānasya prāmāṇyamiti cet ? āha -

pūrvajñānena vyavahārasamāpteḥ kṛtārthatvaṁ pramāṇatvena siddhatvāt |

pūrvajñānenetyādi | yasmād yathoktavidhinā pūrvajñānena vyavahāraparisamāptiḥ, tasmād arthakriyākāritvaṁ pramāṇatvena vyavasthāpyate ||81||

atra paro vyabhicāraṁ darśayannāha -

nanu svapne'pi pūrvajñānāduttarārthapratibhāsijñānāputpadyate | na tanmātreṇa

pūrvajñānasya prāmāṇyaṁ yujyate, tadānīṁ sarveṣāṁ jñānānāṁ bhrāntatvāt |

nanu svapne'pītyādi | svapne'pi pūrvajñānanimittakamuttarārthakriyāpratibhāsijñānam utpadyate | na tanmātreṇa pūrvajñānasya prāmāṇyaṁ yujyate | kathaṁ na yujyate ? āha - tadānīṁ sarveṣāṁ jñānānāmityādi | svapne sarvāṇi jñānāni bhrāntānyeveti pūrvapakṣaḥ ||82||

siddhāntavādyāha -

tatra vijñaptijñānaṁ na kadāciccittaspandanādhipatyena vinā udbhavatītyataḥ tābhyāṁ te anumīyete | bhrāntivaśāt kadācid vyavahite'pyudeti, na tu tadādhipatyarahitatvam | viśeṣastvasti sākṣātparamparayā cetyuktam |

tatra vijñaptijñānamityādi | kriyāvāgākārakaṁ jñānaṁ spandanādhipatyena vinā nodbhavati | ityataḥ tābhyāṁ te anumīyete | viśeṣastvasyeṣaḥ - tato'pio upaplutāvasthāyāṁ vyavahitādhipatyāt paramparayā udayaḥ, jāgradavasthāyāṁ tu avyahitatvena | sarvametad vivecitaṁ prāgeva ||83||

evaṁ vijñaptijñānānāmubhayorapyavasthayoḥ spandanāyattatvaṁ sādhayitvā svapnāvasthāyāṁ vijñaptijñānād uttarakālabhāvijñānāni yathā spandanāyattāni bhavanti tathā pratipādayitumāha -

tatra yathā pūrvavijñaptijñānānāṁ paramparayā spandanādhipatyādudayaḥ tathā taduttarāvasthābhāvināmapi |

tatra yathā pūrvavijñaptijñānānāmityādi | svapnāvasthāyāṁ yathā pūrvavijñaptijñānānāṁ paramparayā spandanadhīpatyādudayaḥ, tathā taduttarāvasthābhāvināmapi | tatra paramparā tvevam - jāgradavasthāyāṁ prathamaṁ tāvat paraspandanādhipatyād vijñaptijñāne, tābhyāṁ prāṇyantarasattāyā anumānam, prāṇyantarasattānumānāt praveśajñānam, tadanu abhivādananamaskārajñāne, tābhyāmapyanu saṁlāpāsanadānādijñānam, tathā ca paṭhanapāṭhanasvādhyāyādijñānāni, tatastāvat kālakrameṇa śayanajñānam, tataḥ nidrāmupaiti | nidrāpūrvabhāvanāvaśācca punarvijñaptijñānayorudayaḥ | tataḥ punaḥ prāṇyantarasattāyā anumānam | tataśca punaḥ praveśasaṁlāpādijñānānāmudayaḥ ||84||

praveśādijñānānāṁ pāramparyeṇotpattiḥ | tāmeva darśayannāha -

vijñaptijñānāśrayaspandanottarāvasthācittasantānādeva paramparayotpādaḥ |

vijñaptijñānāśrayetyādi | jāgradavasthāyāṁ vijñaptijñānasyāśrayo yatparasantānavartispandanaṁ tasya uttarāvasthā, yā pramātranumānasyottaravartisaṁlāpādivyavahārākārajñānajananasamarthā | tadbhāvīni yāni cittāni vijñaptijñānāśrayaspandanottarāvasthācittasantānaḥ, tasmād yathoktaprakāreṇa svapnāvasthāyāṁ praveśādijñānānāṁ paramparayotpādaḥ ||85||

syānmatam - bhavatu paramparayotpādaḥ, vyabhicārastu tadavastha eva | ata evāha -

tatrāpi yādṛganumānaṁ tādṛgavisaṁvādo vyavahāraścāpyastyeveti kenāpi na gṛhyete |

tatrā yādṛganumānamityādi | svapnāvasthāyāmapi yādṛk yāvatkālaṁ paracittasya anumānaṁ tādṛk tāvatkālamātraṁ saṁlāpādirūpo'visaṁvādo'styeva | anyo'nyasaṁbaddho vyavahāraścāpi tāvatkālamrātramastyeva | ityataḥ na kaścid vyabhicāradoṣaḥ | anyaiścāsyaivānyathā vyākhyā kriyate | ta evaṁ vyācakṣate - tatra svapnāvasthāyāmapi kāryaliṅgasya kāraṇe'vyabhicārād yādṛk utpattidharmatayā paramparayā pūrvajñānasyānumānam, tādṛk aprabuddhacittasyāpyarthakriyāpratibhāsodayalakṣaṇo'visaṁvādo'styeva | kālaviprakṛṣṭākārānumānasyāvisaṁvādalakṣaṇasadbhāvādeva vyavahāraścāpi | ityataḥ kenāpi na gṛhyata iti ||86||

tathā parābhūto'pi bāhyārthavādī dhṛtimatyajan punarācaṣṭe -

paracittānumānena tatsvarūpāgrahe'pyavisaṁvādād bhavatu tathā prāmāṇyam |

sākṣāt paracittavidāṁ tu katham ? yadi tāvat paracittasya svarūpaṁ sākṣāt

jānanti, tadā tasyārthāntaragrahaṇaṁ syāt | atha na jānanti, kathaṁ te

sākṣādvidaḥ ?

paracittānumānenetyādi | paracittānumānena tatsvarūpāgrahe'pyavisaṁvādād bhavatu tasya prāmāṇyam, ye tu sākṣāt paracittavidaḥ teṣāṁ tu katham ? yadi tāvat paracittasya svarūpaṁ sākṣājjānanti, tadāsya pratyakṣasya grāhyamarthāntaraṁ syāt | atha na jānanti, tadā kathaṁ te yoginaḥ sākṣādvida iti matam ||87||

hetumupasaṁharannāha -

kathaṁ nāma pratyakṣeṇārthasvarūpasyāgrahaṇaṁ ca bhavati | atha na ġṛhyate, kathaṁ tarhi pramaṇamiti cet ?

kathaṁ nāma pratyakṣeṇetyādi | pratyakṣamarthasvarūpasya grāhakamitīṣyate | yadi arthasvarūpaṁ na gṛhyate , kīdṛk tatpratyakṣam ? arthasvarūpāgrahaṇe pramāṇatvaṁ nirākartumāha - atha na gṛhyate kathaṁ tarhi pramāṇamiti | svarūpagrahaṇanibandhanaṁ hyasya pramāṇatvam | iti pūrvapakṣāśaṅkā ||88||

siddhāntavādinaḥ -

aprahīṇagrāhyagrāhakavikalpayogināṁ paracittajñānamapi vyavahāre'visaṁvādādeva pramāṇam, rūpādidarśanavat; āśrayāparāvṛtteḥ |

aprahīṇagrāhyagrāhakavikalpayogināmityādi | aprahīṇaḥ grāhyagrāhakavikalpo yeṣāṁ yogināṁ teṣāṁ tathā | teṣāṁ yat paracittajñānaṁ tad vyavahāre'visaṁvādādeva pramāṇam, asmadādisambaddharūpādidarśanavat | na tu svarūpagrahaṇāt | aprahīṇagrāhyagrāhakavikalpasya hetum āha - āśrayāparāvṛtteriti | tathā hi , teṣāmālayavijñānalakṣaṇamaparāvṛttam | tasya parāvṛttiḥ grāhyagrāhakavikalpavāsanāyāḥ prahāṇam ||89||

yadi paracittajñānaṁ na svarūpasya grāhakam, kathaṁ tarhi tat sfuṭākārakaṁ bhavatīti cet ? āha -

yogabalāddhi teṣāṁ jñānaṁ paracittakāraviśeṣānukāri sfuṭābhamupajāyate, karmadevādyadhiṣṭhānabalāt satyasvapnadarśanavat |

yogabalāddhītyādi | bhāvanābalāddhi yogināṁ paracittajñānaṁ paracittākāraviśeṣānukāri sfuṭamupajāyate, yathā karmabalād devādyadhiṣṭhānabalācca satyasvapnadarśināṁ jñānaṁ sfuṭamarthākāramudeti ||90||

yadyevaṁ cintyeta - bhavatu bhāvanābalādeva yogināṁ paracittajñānam, tena cittasvarūpasyāgrahaṇaṁ tu kathamiti | āha -

teṣāmapi na paracittāviṣayitvena jñānamudeti | te'pi tadākārasadṛśasvacittapratibhāsameva jānantītyevamavadhāraṇād paracittavida iti vyavahāraḥ |

teṣāmapi na paracittaviṣayitvenetyādi | tat bhāvanābalājjātamapi paracittasya svarūpaṁ viṣayīkartuṁ na samartham | tathāvidhānāṁ yogināṁ grāhyagrāhakaviklpasyāprahīṇatvāt | yadi yoginaḥ paracittasya svarūpaṁ na jānanti, kathaṁ paracittavida ityavadhāryate cet ? āha - te'pi svacittapratibhāsam ityādi | yogino'pi paracittākārasadṛśena svacittapratibhāsenaiva paracittaṁ jānanti [ iti paracittavidaḥ ] ityevamavadhāraṇaṁ kṛtvā vyavahāraḥ pravartate || 91||

yadi tat svarūpaṁ na gṛhṇāti, kathaṁ tarhi pratyakṣam ? kathaṁ ca prāmāṇyamiti cedāha -

tadākārānukārisfuṭābhatvāt tatpratyakṣam, avisaṁvāaditvācca prāmāṇamiti matam |

tadākārānukārisfuṭābhatvāt tatpratyakṣamityādi | yasmāt paracittasyākāraṁ sfuṭamanukaroti, tasmāt pratyakṣamiti matam | yasmāccāvisaṁvādi tasmāt pramāṇam ||92||

prahīṇagrāhyagrāhakavikalpānāṁ tathāgatānāṁ yat paracittajñānam, tat paracittasya svarūpaṁ viṣayīkaroti, āhosvinna | yadi karoti, tasyārtho'rthāntaraṁ syāt | atha na karoti, tadā bhagavataḥ jñānamapyayathārtha syāditi cet ? āha -

acintyo hi bhagavataḥ sarvārthādhigamaḥ, sarvathā jñānabhidhānaviṣayātītatvāt |

acintyo hi bhagavataḥ sarvārthādhigama ityādi | acintyo hi yogivaryāṇāṁ tathā gatānāṁ buddhagocaraḥ | teṣāṁ tu na kevalaṁ paracittajñānamacintyam, api tvaviśeṣeṇa sarvārthasarvākārajñānamapi acintyam | kasmāt ? āha - tadavasthāyāḥ sarvathā jñānabhidhānaviṣayātītatvāditi | tathāgataḥjñānādanyajñānenāvadhārayitumaśakyatvāt jñānaviṣayātītaḥ | tasmād svarūpasya yathāvadanadhigamādeva abhidhānaviṣayātītaḥ |

tathāgatānāṁ punaḥ dvividhaṁ sarvārthajñānam | ādarśajñānena sarvadharmasvabhāvatathatājñānam, pratyavekṣaṇajñānena ca sarvavastujñānam | tatra ādarśajñānaṁ grāhyagrāhakavikalpenāsamprayuktaṁ bhavati | sarvadharmasvabhāvatathatāyāḥ vedanāt sarvārthajñānam, lokottarajñānasvabhāvatvāt |

pratyavekṣaṇajñānaṁ lokottarajñānapṛṣṭhalabdhagrāhyagrāhakavikalpasaṁprayuktāt sarvasūkṣmāvṛtavyavahitavastūnāṁ sarvākāraṁ jānātītyataḥ laukikasarvākārajñānam, lokottarajñānapṛṣṭhalabdhalaukikajñānasvabhāvatvāt | tasmāt pratyavekṣaṇajñānaṁ sarvārthajñānanayena na virudhyate | nāpi vitatham, tasya grāhyagrāhakavikalpasadbhāvābhyupagamāt, tasya cāvitathatvena darśanāt |

samatājñānamādarśajñānamālambate,pratītyasamutpannavastumātraviṣayitvāt | kṛtyānuṣṭhānajñānaṁ tu svasāmānyalakṣaṇaviṣayi | evaṁ sati caturjñānasvabhāvaḥ tathāgataḥ | tatra ādarśajñānaṁ lokottaram | tatpṛṣṭhalabdhānyanyāni ca laukikāni | tadevaṁ bhagavataḥ sarvārthajñānam eteṣu caturṣu yathāyogaṁ yojanīyam ||93||

santānāntarasiddherhi vyākhyānād padavigrahaiḥ |

kuśalaṁ yanmayā'vāptaṁ siddhiṁ tenāpnuyājjanaḥ ||

santānāntarasaṁsiddhervāṅmātravivṛtiḥ kṛtā |

ṭīkā vinītadevena saṁbuddhatvābhilāṣiṇā ||

ācāryavinītadevakṛtā santānāntarasiddhiṭīkā samāptā ||

Technical Details

Text Version: 

Romanized

Input Personnel: 

DSBC Staff

Input Date: 

2007

Proof Reader: 

Milan Shakya

Supplier: 

Nagarjuna Institute of Exact Methods

Sponsor: 

University of the West

Chapter: 

0